Real & Zidane: Pressure a sang nghal

Nizanah Spanish La Liga season ṭan a ni ta a, ngaihven hlawh ber pawl Real Madrid chu zanin dar 8:30-ah an inlan dawn. 

Real hian Celta Vigo chu khualmualah an lenchilh dawn a, nipui transfer-ah euro maktaduai 300 chuang an sen avangin fan-te beiseina a sang ang. Mahse, Real hian pre-season chhung zawngin beisei an phak lo tluan chhuak zak a, transfer bazar-ah an che na viau chungin an duh ang tak an la lo bawk. 

Zinedine Zidane-a'n Cristiano Ronaldo tel loa season ṭan tir aṭanga club a enkawl hmasak ber tur a ni a, nomawi a chawi ho kha Ronaldo vang nge a ṭhat reng vang, tih chu hriat a ni thuai ang. 

Season hmasaah Real Madrid-in manager pathum an nei hman a, inelna hrang hranga an chak loh zat chu 17 a tling - nomawi chawi an nei lo a, mangchhia an tawng. 

Nipui transfer a inhawng a, season chanvea beiseina sang tak nena an lakluh Zinedine Zidane hnenah sum hman tur pawh pek a ni. Mahse, French manager hian a duh ber Paul Pogba chu Manchester United aṭangin a la lalut thei lo a, a duh loh Gareth Bale a chhuahtir thei lo bawk. 

Bale nena an inkar avang ringawt pawhin team boruak a ṭha lo ang tih a chiang a, a tira Real a chhuahsan chhan president Florentino Pérez hi Bale chhuak tur dangtu a ni bawk a, hei hi team boruak ti chhe thei a ni. 

French manager Zidane-a'n season hnih leh a chanve Real a enkawl hmasak khan Champions League (3), La Liga (1), Spanish Super Cup (1), UEFA Super Cup (2) leh Club World Cup (2) a chawi hman. 

Mahse, Zidane hian hetih chhung zawng hian Ronaldo a nei a, Portuguese forward tel loin season a hmachhawn dawn ta - coach ṭha a nih leh nih loh a hriat ang. Pre-season chhung chuan Zidane hi coach ṭha a ni lo - formation hman ngheh a nei miah lo a, a starting XI ber tur hi tun thlengin hriatthiam theih loh a ni bawk. 

French manager hian a hman ngai loh 3-5-2 formation thlengin pre-season-ah a hmang a, tun dinhmuna Zidane chungchang hrilhfiahna awlsam ber chu 'a bo rih' tih hi a ni. 

Real Madrid-in pre-season ah match sarih an khel a, vawi li an tlawm a, vawi thum an chak - an chak pakhatah hian 2-2 a an inhnehtawk hnuin Arsenal lakah penalty hmangin an chak. 

La Liga lama an elpui zinga mi tur Atletico Madrid lakah 7-3 zetin an mualpho bawk a, Zidane hian he result hnua match li an khelhah an chak lohna lai a chingfel chuang lo. Player duh ang la kim thei lo, a duh chhuahtir thei lo, pre-season hmang ṭha lo tih zawng zawng hi Zidane-a'n a hnung puak chungin season a hmachhawn dawn. 

Zanina hnehna chan nghal hi Real tan inrintawkna nei tura puitu ṭha tak a ni dawn a, an chak lo a nih erawh chuan hma hun a êng lo khawp ang. 

Zidane-a'n a formation hman tur ber a la chiang lo miau a, zaninah eng ang takin nge Real Madrid hi an inrem dawn hriatthiam a har. 

Eden Hazard chu hmun chang chiang tur a ni a, mual vei lam sirah a tlan tir dawn nge striker hnungah a tlan tir dawn tih a la hriat theih loh. Striker thar Luka Jovic hi Zidane nen an inhmu thiam lo niin khawthlang media te chuan an tarlang leh der tawh a, Karim Benzema nen an inkawp ai mah chuan a tu emaw zawk zawk an mal tlat a rinawm. 

Rawlthar duhawm tak tak Vinicius Junior, Rodrygo Goes, Brahim Diaz, Takefusa Kubo, Ferland Mendy, Eder Militao leh Fede Valverde te ho an awm thar bawk a, duhthlan tur Zidane-a'n a nei.