Barca-ah Neymar-a 'n hlawh tlem pawiti lo
Real Madrid leh Barcelona ten lakluh tuma an dawr mek Neymar-a'n Nou Camp-a kir theih dan a dap mek a, Paris St-Germain forward hian Barca tana a khelh theihna tur a nih chuan a hlawh chu kum khata pound maktaduai 13.7-a tih hniam pawh a pawiti lo.
Barcelona chuan Neymar hi pound maktaduai 92.4 leh Philippe Coutinho pe tel chunga lakluh an duh a, mahse PSG chuan pawisa hi a aia tam zawk an beisei avangin Catalan club dawrna hi an hnawl rih. Spanish journalist lar Guillem Balague chuan, "Neymar hian kum khatah pound maktaduai 34.7 a hlawh mek a, mahse Barca-a a kir theihna tur a nih chuan kum khata pound maktaduai 21 hlawh pawh a pawiti lo," a ti.
Balague chuan sawi zawmin, "Lionel Messi, Gerard Pique leh Luis Suarez ten Neymar hi neih let an duh vek a, club president Josep Maria Bartomeu hian kum hnih hun a la nei bawk a, sulhnu ropui tak hnutchhiah a duh a ni." a ti a, Barca hian PSG an dawr chhunzawm a rinawm hle.
Real Madrid pawhin Neymar hi lakluh tumin an dawr a, Gareth Bale leh James Rodriguez pek tel an inhuam bawk. Mahse, Madrid khaw club dawrna pawh hi PSG chuan an hnar rih. Barca boss Ernesto Valverde chuan, "Neymar hi PSG ta a ni a, thil thleng tur chu kan hmu thuai ang. Mahse, tunah chuan engmah sawi belh theih ka nei lo," a ti.
PSG hian Pathianni Zan dar 12:30-ah Ligue 1 match khel turin Rennes an lenchilh dawn a, match hmasa berah Neymar tel loin Nimes chu 3-0 in an hneh tawh.
Zanin Inkhel Tur
Nantes 09:00 PM Olympique Marseille
Metz 11:30 PM Monaco
Toulouse 11:30 PM Dijon
Nîmes 11:30 PM Nice
Amiens SC 11:30 PM Lille
Bordeaux 11:30 PM Montpellier
August 18, Pathianni Zan
Saint-Etienne 06:30 PM Brest
Reims 08:30 PM Strasbourg
Rennes 12:30 AM PSG