US Open-ah Murray inlan dawn lo

Tennis season khat chhunga Grand Slam hnuhnung ber US Open-ah Andy Murray a inlan dawn lo, Britain tlangval hian singles a khelh theih loh tur thu a sawi hnuah doubles pawh a khel dawn lo tih a sawi chiang leh ta.

January thlaa Australian Open khelh hnuah a vawi hnih nan Murray hi a khel bawr zai a ni. Kar hmasa khan Cincinnati Masters-ah singles match a khel a, match hmasa berah a chak lo nghal. Kum 2012 US Open champion Murray hian New York-ah singles a khelh loh tur thu a sawi nghal a, tun hnaiah thu dang nei lehin Murray chuan, "US Open-ah ka inlan dawn lo, kei chuan dawhthei takin singles match ka khelh leh theih hun tur nghah hi ka duh zawk a ni," tiin a sawi. Best of three set khelh chu zuam mah se set nga khel turin a la inpeih lo.

Grand Slam vawi thum champion tawh Murray hi kar leha khelh tur Winston-Salem, North Carolina-ah wildcard pek a ni a, ani bakah hian Kevin Anderson, Denis Shapovalov, Tomas Berdych leh Dan Evans te pawh an inlan ang.