Man City dal thei tur Tottenham

Manchester City-in kum zawnin Premier League nomawi an chawi tawh a, Pep Guardiola hote hi a lungthu kim nan an champion leh ngei ringtu pawh an tam hle. Pep Guardiola hote hian zanin dar 10:00 hian Etihad Stadium-ah Tottenham Hotpur an mikhual dawn a, season la inṭan dawn chauh mah se inkhel pawimawh bik a ni.

Manchester City hian Spurs an hmachhawn zawhah big 6 zinga mi club an hmachhawn leh hun tur chu November 9 daih a ni dawn a, hetah hian an elpui ber tura ngaih Liverpool chu Anfield-ah an hmachhawn chauh ang.

Pep-a hote hian London club hi an hneh a nih chuan Bournemouth, Brighton, Norwich City, Watford, Everton, Wolves, Crystal Palace, Aston Villa leh Southampton te nen an inkhel dawn. Man City tan chak vek theihna a ni a, Liverpool lamin inhliam an ngah bawk nen November thla tir lamah Pep Guardiola hote hi sang fal thei dinhmunah an ding dawn. 

Pep-a hote hi an inrem dik tak tak hmain Tottenham hian an dang a nih loh chuan season liam ta ang lo takin Premier League champion hriat hma theihna chance a sang hle a ni.

Manchester City-in Pep Guardiola an lak chhan nia lang chu Champions League a ni a, season liam ta khan Premier League, FA Cup leh League Cup-ah champion vek mah se Spurs vangin Europe inelna sang ber aṭangin an tla.

Spanish manager Guardiola chuan, "England ka rawn kal aṭangin Spurs hi champion thei zinga mi an ni ziah. Europe-a team ṭha ber pahnihna an ni," tiin a khingpui tur a dah sang a, an fimkhur ngei pawh a rinawm. Player chungchang sawiin Pep chuan, "Kevin De Bruyne hi team tiphurtu a ni a, season liam taa a inhliam avangin tun season-ah a inhliam leh dawn tihna a awm lo. Kevin hian theihna danglam tak midang neih loh a nei a, team ṭhatna turin kan hman ṭangkai a ngai," tiin Belgian midfielder a fak hle.

Manchester United manager hlui Jose Mourinho chuan Premier League champion thei chu Manchester City, Liverpool, Tottenham Hotspur leh Man City B team a nih thu a sawi.

Hemi chungchang zawhna chhangin Pep-a chuan, "Txiki Begiristain hian hna ṭha tak a thawk a ni," tiin player lakhawmtu club director of football a fak daih a; Mourinho sawi tel loh Chelsea, Manchester United leh Arsenal te chu champion thei an nih thu a sawi tel bawk.

Spurs manager Mauricio Pochettino chuan, "Mou hi khawvela manager ṭha ber zinga mi a ni a, pa fing tak a ni. A ngaihdan hi a ka zah sak a, anni anga manager ropuiin champion thei tura kan team a ring hi ka lawm. A hma aiin inrintawkna kan ngah sawt ang," tiin a sawi ve bawk.