MPL ṭan nan ni 19 la awm

Mizoram Football Association chuan Mizoram Premier League khelh ṭan hun an tichiang ta a, Mizoram chhunga football inelna sang ber hi September 5 hian khelh ṭan a ni dawn.

August 15-a MFA executive committee chuan Centralised Registration System (CRS) chungchang an rel a, Santosh Trophy coach atan Lalremtluanga an ruat. Dinthar FC pawh lo enkawl tawh RT-a hian Santosh Trophy-a Mizoram team a enkawlna tur a ni ang.

Mizoram Premier League Season 8 chu September 5, 2019 aṭanga khelh tan tura ruahman a ni.

MPL hi a season riatna a ni tawh dawn a, tun season-ah hian Aizawl FC, Chanmari FC, Chawnpui FC, Chhinga Veng FC, Electric Veng FC, FC Venghnuai, Mizoram Police FC leh Ramhlun North FC-te an inel ang.

All India Football Federation chuan India ram puma footballer-te hmun khata an inziah luhna, Centralised Registration System chu hmang tura MFA-te an hrilh angin MFA Executive Committee meeting chuan hman ṭan turin a rel a, MPL aṭanga hman tan phawt ni se, tih a ni.

CRS hian nghawng thui tak a neih theih dawn avangin a hman ṭan dan tur chungchangah hian MFA Registration Committee leh MPL club-te an inrawn khawm leh dawn a, chumi hnuah a kalphung tur puanzar a ni ang.

AIFF chuan 2019-2020 season Santosh Trophy chu September-a zonal qualifier khelh turin ruahmanna a siam a, MFA chuan Santosh Trophy team ṭha tak din tumin hetiang hian mawhphurtu a ruat nghal. Manager - T. Vanlalhluna,

MFA Executive Committee member; Asst. Manager - K. Lalenghluna, MFA Executive Committee member; Coach - Lalremtluanga, Venghnuai te an ni a, MFA technical Committee-te nen thawk hoin hma an la ang.

MFA Referee Committee ruahmanna angin August 22, 2019 hian MFA chuan referee-te intuai tharna turin Referee Clinic Lammualah a buatsaih dawn a, District FA tin aṭangin referee-te beisei an ni.

August 23-24 hian Match Commissioner training neih a ni dawn bawk a, Mizoram hmun hrang hrang aṭangin Match Commissioner turte beisei an ni ang. MPL8 ṭan hmanin referee-te fitness test neih a ni bawk ang.

AIFF hnuaia National Sub Junior Boys Football Championship khel turte chu tunah hian Ramhlun Sports Complex-ah training an nei mek a, Mizoram hmun hrang hranga rawlthar ṭha rualte lak khawm an ni.

Hei bakah hian National Senior Women's Football Championship khel turin MFA chuan team inbuatsaihna a nei ṭan dawn bawk a, mawhphurtu tur ruat an ni tawh a, player an inko khawm ṭan mek a ni.