Bagan-in City thlah fal duh lo

ATK Mohun Bagan chuan Nilaini zan khan Bengaluru FC chu 2-0 in an hneh a, Indian Super League playoff khel turin an dinhmun an sawhnghet zel - Mumbai City an thlah fal duh bik lo. 

Bagan tan Roy Krishna chuan minute 37-naah ama penalty hlawhchhuah chu goal-ah a chantir a, minute 44-naah Marcelinho chuan a khung ve leh bawk.

Brazilian midfielder Marcelinho hian ISL-ah Delhi Dynamos, Pune City leh Hyderabad FC tan hming a lo chher tawh a, tun season ṭan dawn khan Odisha a zawm - beisei a phak loh hnuah Bagan hi January khan loan-in a zawm a, Odisha tan match riata goal a khung loh hnuah Bagan tan match thum khelin goal hnih a khung tawh!

Sunil Chhetri hoa khel Bengaluru-in a chhanletna tur an nei thei lo a, an keeper ṭha mi Gurpreet Singh Sandhu chet ṭhat zan ni lo se Bangalore club hi goal tam zawk chhuah thei an ni. 

ISL-ah hian Mumbai City chuan table chung ber luahin playoff an khel dawn chiang tawh a, hemi piahlama an rilru luah tur chu AFC Champions League khelh a ni ang. 

ISL-ah league round hmahruaituin tun season aṭangin Champions League an khel ṭan a, season thara Champions League khelh ngei duhin Bagan leh City an inum zel ang - match li chiah khelh tur an nei ve ve tawh a, point khat chiahin an inthlau!