Andreescu leh Kvitova an tla

Australian Open khelh laiah hmeichhe singles champion tura rinkai zinga mi Bianca Andreescu leh Petra Kvitova te chu second round paltlang zo loin an tla. Serena Williams erawhin harsa vak loin third round a inhlangkai thung.

US Open 2019 nomawi a chawi hniah Andreescu a inlan lo vang vang a, hliam leh hrileng vangin a inkhel tam lo. Grand Slam a khelh lehna hmasa berah a inkhelh tam loh a lang, Taiwan nula Hsieh Su-wei lakah 6-3, 6-3 in a chak lo.

Tun hnai thla 15 chhunga match hnih chauh kheltu Andreescu chuan, "Ka theihna zawng zawng hlan mah ila hnehna chan nan a tawk zo si lo, tihsual ka ngah kha a pawi lai chu a ni," a ti. Nimin chawhma lam khawlum lam khan 30C a ni a, player ṭhenkhat tan chuan a lum mah mah.

Seeded pakuana Kvitova pawhin beisei a phak lo. Czech nula hi 2019 maia final a khelhna hmunah hian Sorana Cirste lakah 6-4, 1-6, 6-1 in a chak lo. Wimbledon vawi hnih champion tawh hian winners vawi 21 vaw chhuak mah se a tih sual vangin point 44 zet a hloh a, a tawpah a tuar.

Nimin inkhel dangah Serena tan harsatna a awm lo. American star hian Nina Stojanovic lakah game thum chauh a hloh, nuamsa takin 6-3, 6-0 in hnehna a chang. Vawiinah Anastasia Potapova nen an inhmachhawn leh ang.

Season hmasa finalist Garbine Muguruza pawh a la kaltluang. Spanish nula hian Russian player Liudmila Samsonova chu 6-3, 6-1 in a hneh, seeded pasarihna Aryna Sabalenka pawhin Daria Kasatkina chu 7-6 (7-5), 6-3 in a hneh ve bawk.