Ronaldo awmna Juve an tlang

Juventus chuan Inter Milan hnehin a vawi 20 nan Coppa Italia final an lut. Thawhlehni zan semifinal second leg inkhelah team pahnih goal awm loin an inhnehtawk, inkhel hmasa zawkah Old Lady lamin 2-1 a hneh lo chang tawhin an tlang.

Allianz Stadium-ah goal khung ngei ngei ngai chungin Inter an lenglut. Antonio Conte-a'n goal nawr turin a naute a rem, mahse striker Romelu Lukaku leh Achraf Hakimi ten an hun ṭha neih an chhawr ṭangkai thei lo.

An intawn hmasaka goal khungtu Cristiano Ronaldo-a'n dinhmun sawhngheh zual theihna hun nei mah se keeper Samir Handanovic a paltlang zo lo, a kum zawnin Juve hian final an khel dawn.

San Siro a first leg an khelh ṭum khan, mualneitu lamin Argentina striker Lautaro Martinez hmangin goal hmahruai khung mah se mikhual lamin Ronaldo goal hnih hmangin an chhanglet, Real Madrid forward goal hnih khungsa hi final thlen nan a tawk.

Juve manager Pirlo chuan,"Season khat ka hmanna chauh a ni a, Italian Super Cup kan chawi bakah Coppa Italia final kan lut, Champions League last 16 kan thlen bakah Serie A kan la beisei bawk, hun duhawm kan hmang mek niah ka ngai.

"Amaherawhchu hlawhtlinna kan la chang lo tih hriat a ngai. Ka nauten an khel ṭha em em a, a bik takin tlarhnung lamin goal an venhim ṭhat avangin kan tlang niah ka ngai," tiin a sawi.

Season hmasa final-ah Bianconeri hi Napoli nen hun pangngaiah goal awm loin an inhnehtawk a, penalty shootout an neih hnuah Juve an tlawm. 

Nizan khan semifinal lehlamah champion lai Napoli hi Atalanta nen an inkhel a, a chak zawkin Pirlo naute nen nomawi an inchuh ang.