Man United-in quarterfinal an lut

Manchester United-in Thawhlehni zan khan West Ham 1-0 in an hneh a, quarterfinal an lut. Old Trafford-a inkhelah hian minute 90 chhungin goal a lut lo a, extra time minute 97-naah Scott McTominay-a'n goal awmchhun a khung. 

Inkhel dangah Bournemouth-in Premier League club Burnley an barakhaih a, Championship club hian Sam Surridge leh Junior Stanislas te goal hmangin 2-0 in hnehna an chang.

Ole Gunnar Solskjaer-a'n kartawpa Everton nen inhnehtawk team aṭangin player paruk ngawt a thlak a; keeper Dean Henderson, Alex Telles, Nemanja Matic, Fred, Donny Van de Beek leh Anthony Martial ten bul an ṭan. Bench-ah rawlthar duhawm Amad Diallo Traore a awm bawk.

David Moyes-a'n Fulham nen an inhnehtawk ṭuma hnawhchhuah Tomas Soucek chu hremna hnuhkir avangin chhawr thei mah se Jesse Lingard-a'n amah neitu a hmachhawn thei lo a, inhliam vangin Michail Antonio a inlan thei lo bawk.

Man United-in inkhel thunun mah se goal hmuh tur a awm mai lo. Alex Telles-a corner pet chu Victor Lindelof-a'n tauh fuhin goal ban a per a, second half-ah Marcus Rashford-a'n keeper chiah a hmachhawn hnuah a pet goal lo.

Minute 90 chhung goal hmuh tur a awm lo a, bench aṭangin Bruno Fernandes, Scott McTominay, Edinson Cavani, Luke Shaw leh Brandon Williams te an luh tawh bawk avangin extra time-ah chuan United team ṭha bawk hmuh a ni.

Extra time second half-ah United-in counter attack an hmang ṭangkai a, Bruno leh Fred te bul ṭan chu Hammers-in an clear mai thei lo. Rashford zawnah ball tlain English forward ball pek chu McTominay-a'n vawi khatah pet nghalin goal pawimawh a khung.

Everton nen an inkhelh ṭum ang thoin United tlarhnung a pawp leh a, subsitute Said Benrahma-a'n vengtu nei lo mah se keeper Henderson zawnah a tauh a, Solskjaer-a hote hrem nawn an ni lo.

United manager Ole Gunnar Solskjaer chuan, "Engtin pawhin chak ila a pawi lo. Kan tum ber chu nomawi chawi a ni a, chumi tih hlawhtlin chu kan tum a ni. Everton lakah hun tawp dawna goal chhuah vangin kan hnual a, rang takin kan insiamṭha lehnghal a ni," tiin a sawi a, goal an chhuah loh avanga a lawm thu a sawi bawk.

Manchester United hian Pathianni zanah West Brom an hmachhawn ang a, hemi zawh hian Real Sociedad (Feb 25 zan), Chelsea (Feb 28) leh Manchester City (Mar 6) te an hmachhawn dawn a, hmabak a hautak hle.