Chelsea hmaah Barnsley

Chelsea-in zanin dar 1:30 hian FA Cup last 16-ah Championship-a 13-naa awm mek Barnsley an hmachhawn dawn. London club hian manager thar Thomas Tuchel-a hnuaiah hneh loh an la tawng lo a, record duhawm hi chhunzawm zel an tum ang.

Blues hian defender Thiago Silva chu inhliam vangin an chhawr thei lo a, Tuchel-a tan player siksawina hun ṭha a ni thei ang. German player ṭha pahnih Timo Werner leh Kai Havertz te tun hnaiah an che ṭha tawk lo a, FA Cup-ah khelhna hun an neih theih a rinawm.

Sheffield United nen an inkhelh ṭumin Christian Pulisic chu mimal thil vangin a inlan thei lo a, Barnsley nen pawh a chiang lo. Tlarhmaah FA Cup-a record nei ṭha Tammy Abraham a awm. English striker hian FA Cup-a vawi ruk bul a ṭanah goal riatah a inrawlh a, goal nga khungin assist vawi thum a nei a ni.