Real tan beisei a la bo lo

Spanish La Liga-ah Real Madrid-in champion beiseina an neih chhunzawm ve zel a, Thawhlehni zan khan league match-ah Getafe chu 2-0 in an hneh. 

Real tan an goal khung khawl Karim Benzema leh defender Ferland Mendy-te chuan goal khat ve ve an khung a, Getafe-in a chhanletna tur an nei lo. 

Zinedine Zidane-a nauten hnehna an chan avangin  champion beiseina thi lek lek tawh chu a nung thar ve leh a, hmahruaitu Atletico Madrid an phak lohna chu point nga chiah a ni ta. 

Hetihrual hian Atletico Madrid hian Real aiin match hnihin an la khel tlem zawk tih hriat tel a ṭha a, Atletico kutah engkim a la innghat, tiin sawi theih a ni. 

Real-in tun hnaiah khelmual chhung leh pawn buaina an nei a, Getafe an mikhual zanah pawh Zidane-a'n hliam vangin first team player pakua ngawt chu squad-ah a dah thei lo.

Player langsar zingah Eden Hazard, Sergio Ramos, Federico Valverde, Toni Kroos leh Alvaro Odriozola-te hmel hmuh tur a awm lo a, Zidane-a'n ṭum danga a hman khat tak 3-4-3 formation a rawn hmang. 

Season hmasa lawka Real tana UEFA Youth League nomawi chawitu zinga mi Marvin Park chu inkhel bul ṭantir a ni a, kum 20 mi attacking midfielder tan Real senior team tana a bul ṭanna hmasa ber a ni - bench aṭanga luhtir Victor Chust chuan Real tana a league match hmasa ber a khel a, rawlthar Sergio Arribas pawh bench aṭanga luhtir a ni. 

Hetihrual hian Real hi chhe ta lua a sawi erawh a rem lo - Park tih loh bul ṭantu hi chu hming langsar vek an ni a, Thibaut Courtois, Nacho, Raphael Varane, Ferland Mendy, Casemiro, Luka Modric, Marcelo, Marco Asensio, Benzema leh Vinícius Júnior-te chu player langsar vek an ni. 

Real Madrid-in Getafe lakah goal erawh an khung lawk bik lo a, minute 60 an nghah thlen a ngai - goal khungtu erawh ṭum dang ang thoin Karim Benzema a ni a, Vinícius Júnior  siamsak chu a tauh lut. 

Minute ruk a liam a, Real bawkin goal an khung nawn - mual vei lam sira goal nawr tura khelhtir Marcelo chuan Mendy tan a siamsak a, French left back hian Marcelo ball cross hi an goal hnihna ni turin a lo tlawh lut a ni. 

Tun season La Liga-a goal khung harsat Getafe-in Real an ngam ngang lo a, inkhelh chhung zawngin vawi khat chiah shot an nei thei - target-ah a la kal lo zui!  2003-04 season hnua team pakhatin La Liga-a an khingpui laka shot an la neih tlem ber record a ni hial. 

Getafe hian tun season-ah goal khung an harsat hrim hrim - league match 22 aṭangin vawi 17 chiah goal khung an la nei a, Real lakah an khingpui team aṭanga loan hmanga an hawh Takefusa Kubo chu bench aṭangin luhtir mah se Japan forward hian danglamna a thlen thei bik lo. 

Real tan Benzema-a'n goal hmahruai a khung a, tun season La Liga match 20-a goal 11-a khungna chiah a  ni a, inelna hrang hrangah match 27 khelin goal 16 a khung tawh - assist vawi nga a nei bawk. 

Real hian Cristiano Ronaldo an chan hnuah Gareth Bale leh Eden Hazard chu a hmun ruak luah thei tura an beisei a ni a, mahse, Benzema zawk hi tun thleng chuan Ronaldo chhuah hnua Real goal khung khawl a ni. 

French striker hian La Liga bikah Real tan match 369 khelin goal 180-a khung tling ta a, assist vawi 100 a nei bawk - goal 280 zet chu a thawk chhuak tawh tihna a ni a, a nep lo hle. 

Benzema chuan, "Getafe kan hneh avangin inrintawkna kan neih belh leh dawn a, kan ṭhat dan bera khel chhuak leh turin kawng kan zawh mek a ni," tiin a mimal hnathawh aiin club dinhmun a thlir. 

Real boss Zidane chuan, "Engmah a inthlak danglam dawn lo. Point 51 ngawt a la hlawhchhuah theih a, theihtawp kan chhuah zel ang. Kar hmasa lawk pawh khan ka sawi tawh a, thil dang ngaihtuah loa theihtawp chhuaha, kan hna thawh zel hi kan tih tur chu a ni," a ti. 

French coach chuan fan-te thlawpna an la neih reng thu sawiin, "Madrid ṭantu zingah league nomawi ban phak tawh lo anga min ngai an awm ka ring lo. Fan-te hian engtiklai pawhin kan chungah rinna an nghat a, an rin ang ngeiin kan ti ang. Ni e, harsatna tam tak chu kan la hmachhawn dawn ngei a, mahse, kan hnathawha rinna nghat chungin kan bei zel ang," tiin a sawi. 

Real hian kar hmasa khan league match-ah 2-1 in Huesca an hneh a, Getafe an hneh leh tak avangin a zawnin hnehna an chang ve ta. Huesca an hmachhawn hmaa inelna hrang hranga an match hnuhnung pangaah vawi khat chiah an chak a, an insiamṭha leh ṭan mek. 

La Liga inkhel dang a awm lo a, Real leh Getafe-ten kar laklawha match an neih chhan hi first round-a an match tur an sawn vang a ni - Covid-19 vanga European competition match sawn tlai ngai khan a nghawng a ni.