Curry hoin Warriors an chak
Stephen Curry-a point 32 neih hmangin Golden State Warriors chuan San Antonio Spurs 114-91 in an hneh a, tun hnaia match thum chak zawn tawh Spurs kaltluang lai chu an tih tawpsak.
Tun hnaiah Golden State an cheṭha tawk lo, season hmasa ang khan an zuih leh mai dawn niin lang mah se an tho chhuak leh ta. Curry bakah hian Eric Paschall (15 points) leh Andrew Wiggins (14) ten hnehna an chan theih nan an thawhhlawk hle.
San Antonio tan Rudy Gay (17 points), Trey Lyles (15) leh point 13 nei pahnih Keldon Johnson leh Patty Mills te khel ṭha thawkhat mah se hnehna chan nan a tawk zo lo, Inrinni zinga Atlanta Hawks nen an inhmachhawn hunah insiamṭhat an tum ang.
Hri leng vangin NBA regular season khelh dan phung ṭhenkhat a danglam. Warriors chuan an match hmabak pali chu anmahni mual Chase Center-ah an khel dawn, Zirtawpni zing hian Orlando Magic an hmachhawn dawn a ni.
NBA Results
Miami Heat 98 - 96 New York Knicks
New Orleans Pelicans 130 - 101 Houston Rockets
San Antonio Spurs 91 - 114 Golden State Warriors
Sacramento Kings 111 - 119 Philadelphia 76ers
Utah Jazz 122 - 108 Boston Celtics
Portland Trail Blazers 106 - 97 Orlando Magic