Barca hmachhawn thei lo tur Di Maria

Paris St Germain winger Angel Di Maria chu Barcelona nen Champions League last 16 an khelh hunah a inlan thei dawn lo. Argentina international hi a malpui hliam vangin a chawlh rih a ngai dawn a ni.

PSG hian Ligue 1 match an khelh hnuhnungah Marseille 2-0 in an hneh, an chak ṭum hian Di Maria hian hliam a tuar. PSG manager Mauricio Pochettino chuan, "Angel tan Barca hmachhawn theih a ni lo ang.

"A dinhmun hi uluk taka endik a ni a, chumi hnuah a chawlh rih a ngai dawn tih a chiang tawh," a ti. PSG hian February 16 hian Barcelona hmachhawn turin Nou Camp an tlawh ang.

Argentine manager chuan sawi zawmin, "Angel hi tel thei ngei se duhthusam chu a ni. Mahse ani a tel thei lo a nih pawhin theihtawp kan chhuah dawn tho a, kan chak theih dan tur kawng hran kan dap mai tur a ni ang," a ti.

Season hmasa khan PSG hian UCL final an lut a, mahse German champion Bayern Munich an ngam loh avangin pahnihna an ni. Club neitu lamin European champion nih ngei an duh vangin Thomas Tuchel pawh an ring zo lo.

German manager banin Poch an lalut a, Tottenham a enkawl laia nomawi la chawi ngai lo Poch tan Champions League nomawi lak tum hi chona lian leh hautak a ni ang.