Djokovic-a'n Tiafoe hneh hram

Australian Open champion lai Novak Djokovic chuan nimin khan fiahna hautak a paltlang. Serbian star hian third round lut turin a khingpui Frances Tiafoe chu harsa takin a hneh hram.

Djokovic leh Dominic Thiem ten hnehna an chan lai hian Stan Wawrinka erawh a chak lo. 2014 champion hi Marton Fucsovics nen darkar thum leh minute 59 an inkhelh hnuah 7-5, 6-1, 4-6, 2-6, 7-6 (11-9) in a chak lo.

Vawiin hian world number 2 leh seeded pahnihna ni bawk Rafael Nadal a inlan dawn. Spanish star hian tlai lamah qualifier aṭanga in vaw tling Michael Mmoh a hmachhawn ang.

Djokovic tan chuan Melbourne Park hi hmun duhthusam a ni a, player dangte tan hmachhawn chakawm lo ber a ni. American player Tiafoe erawhin a chai thei viau a, darkar khat leh a chanve chhungin Novak hi 6-3, 6-7(3), 7-6(2), 6-3 in a chak hram.

World number 1 Djokovic chuan, "Ni a sa hle a, court chhung boruak a lum takzet. Ka khingpui kha player ṭha tak a nih bawk avangin inkhelh a harsa takzet a ni. Frances nen kan vawi khat intawnna a ni, hetiang taka a khel thei hi ka lawmpui," a ti.

Seeded pakhatna hian a match lehpekah chuan Reilly Opelka leh Taylor Fritz inkhela chak zawk a hmachhawn dawn. Djokovic tan a tu zawk zawk pawh hi hmachawn hautak tur niin a lang lo, chutih rualin tournamet lianah chuan chet sual ve theih a ni bawk.

Season hmasa finalist Thiem tan second round paltlang turin harsatna a awm lo. Austrian tlangval hian darkar khat leh minute 39 chhung lekin Dominik Koepfer chu 6-4, 6-0, 6-2 in a hneh a, a kingpui hian break point a hmu miah lo.

Seeded pathumna Thiem chuan, "Set hmasa berah khan thil a awlsam vek bik lo, set ka lak hnuah erawh a hnu lam kha chu nuamti takin ka khel zui thei tawh, set hloh loa chak theih hi duhthusam a ni," a ti.

Thiem hian Nick Kyrgios leh seeded 29-na Ugo Humbert inkhela chak zawk a hmachhawn leh dawn a, third round aṭang chuan set hloh loa chak a awmsam tawh lo mai thei, fimkhur zual a ngai tawh ang.

Grand Slam vawi thum champion tawh Wawrina hi a khelh fuh ni chuan player ṭha ber ber hneh thei a ni. Mahse, hliam vangi a buai fo a, a hliam dam leh tawh mah se tun hma angin a khel chhuak thei ta meuh lo - kum 35 mi a nih tawh avangin a hun ṭha a liam tawh niin a lang.

Inkhel dangah seeded 14-na Milos Raonic chuan Corentin Moutet 6-7 (1-7), 6-1, 6-1, 6-4 in a hneh a, Wimbledon final khel tawh hi tun hnaiah a khel ṭha thei viau, third round-ah Marton Fucsovics nen an inhmachhawn leh dawn.

Seeded pariatna Diego Schwartzman pawhin harsatna a tawk lo. Argentine tlangval hian Alexandre Muller 6-2, 6-0, 6-3 in a hneh a, a match hmasa zawkah khel ṭha tawk lo mah se a insiamṭha tawh tih a takin a lang.