AFC leh Trau danglamna foreigner

Thawhlehni zan I League inkhel hmuhnawmah Aizawl FC-in Manipur club Trau 1-0 in an hneh lo. Kalyani Stadium-a goal awmchhun hi Tajikistan international forward Komron Tursunov khung a ni.

Mizo club-in point an hmuh zawh loh avangin pariatnaah an tla thla a, relegation playoff khel tur zingah an tel rih. Tun season I League-ah hian vawi khat ṭheuh an inkhelh kual zawhah a sang parukin champion tur an zawng ang a, a hnuai lam pangain relegate tur an zawng thung ang.

Aizawl FC-in bul ṭantu 11 zingah captain Alfred Kemah Jaryan chiah foreigner an nei a, player 10 dang hi Mizo an ni. Defender Richard Kasagga chu inhliam vangin a inlan thei lo a, Nigerian forward Princewill Emeka erawh a ṭhat tawk loh vanga chhuahtir a ni thung.

Manipur club Trau erawhin foreigner pali nen bul an ṭan. Tlarhnungah Brazilian defender Helder Lobato-a'n a ho a, midfield-ah Nigerian midfielder Joseph Olaleye leh Brazilian midfielder Bruno Rodrigues bakah Tajikistani forward Komron Tursunov te nen bul an ṭan.

Mizo club-in nung takin inkhel bul an ṭan a, inkhel pawh a hmuhnawm nghal. Amaherawhchu I League-a goal rang ber khungtu Tajikistan international forward Komron Tursunov-a'n AFC tlarhnung tih ṭhat tawk loh chu remchangah lain minute ngana lekah a khalh lut a, box chhung chiah chiah aṭangin ṭha zetin a pet lut.

Kum 26 mi Tursunov hian January thla khan Real Kashmir an hmachhawn ṭumin second kua lekah a pet goal tawh a, Mizo club lakah a thiamna a pholang nawn. Mizo defender-ten an tih tur ti tawk lo mah se Tursunov-a'n player na zawng goal khung lohna turah a khung tihin a sawi theih.

Mizo club-in ball an chang tam zawk a, hun tawpah phei chuan 68% an chang pha hial Amaherawhchu tlarhma a bil avangin an hun ṭha neih an bawhpelh. First half-a Ramhlunchhunga penalty hlawhchhuah chu MC Malsawmzuala'n a pet a, Siaha tlangval hian cool takin keeper bum tum mah se a pet duh dah avangin a vanduai - goal ban a per hnuah goal chhungah a lut lo.

Trau hian an foreign player hmangin keeper Lalmuansanga tan hna an siamsak a, chance ṭha erawh Mizo club-in an ngah zawk. Substitute Lalliansanga pawhin siphurh sut theihna tur hun ṭha a nei a, keeper chauh a hmachhawn hnuah a pet goal lo. Trau keeper Amrit Cope-a'n midfielder R. Malsawmtluanga pet a nam over bawk. Mizo club-in Trau goal attempt neih zat let li daih an nei a, vawi 17 goal attempt-ah vawi li goal zawnah pet mah se goal an khung lo.

Mizo club hi pariatnaah an awm mek a, chutihrualin a sang pathum Churchill Brothers, Roundglass Punjab leh Trau aiin match khatin an khel tlem. Aizawl FC hian an khelh hmabak match lia an chet ṭhat chuan champion tur zawng tur team paruk zingah an la tel thei ang.

Yan Law hote hian Sudeva Delhi FC, Mohammedan SC, Real Kashmir leh Chennai City te an la hmachhawn dawn. Mizo club hian February 14, Pathianni zan dar 7:00-ah Sudeva Delhi an hmachhawn leh ang.