FIFA Club World Cup Nomawi paruk chawi tum Bayern

FIFA Club World Cup final chu zanin dar 11:30 hian Education City Stadium, Ar-Rayyan, Qatar-ah khelh a ni dawn. European champion Bayern Munich leh North American champion Tigres UANL ten an khel ang.

Bundesliga champion Bavarians hian hnehna an chang a nih chuan thla 12 chhunga nomawi paruk an chawina tur a ni a, Hansi Flick-a hote hi Champions League, UEFA Super Cup, German Super Cup, Bundesliga leh DFB Pokal-ah te an champion tawh a ni. 

Bayern Munich captain Manuel Neuer chuan, "History siam turin theihna kan nei a ni," tiin a sawi a, FIFA Club World Cup final-ah hian rinkai zawk an ni ang. Kum 2009 khan

Barcelona-in kum khat chhunga nomawi chawi theih paruk chu an chawi vek a, Bavarians hian Pep Guardiola hote record duhawm tak hi an nih rual thei dawn a ni.

Bavarians hian hliam vangin Club World Cup-ah hian Leon Goretzka, Tanguy Nianzou, Javi Martinez leh Alexander Nubel te an hruai tel lo a, chutihrualin semifinal-a Egyptian club Al Ahly an hneh ṭumin Hansi Flick-a'n rinlawk aia ṭha player a luhtir.

Final-ah pawh Bayern boss Flick hian keeper Manuel Neuer aṭanga goal khung khawl Robert Lewandowski thlengin an ṭhat dan bera a hriatin a khelhtir leh ang. Flick chuan, "Champion tumin kan rawn kal a, Bayern chanchin atana sulhnu ṭha hnutchiah ngei kan tum," tiin a sawi.

Lewy leh Neuer te hi khawvel huap pawha mahni position-a ṭha ber an ni a, right back leh midfield-a chhawr theih Joshua Kimmich hi a phu ang tawkin ngaihsan a hlawh lo. World Cup-a Germany champion puitu Bayern legend Philipp Lahm nen Kimmich hi khaikhin a hlawh a, Flick-a hnuaiah pawh player pawimawh ber zinga mi a ni.

Bayern khingpui tur Tigres UANL tan an thlen chin hi thil thar a ni a, semifinal-a Copa Libertadores champion Palmeiras an hneh ringawt pawh hi a hlawhtlinna a ni tawh. Chutihrualin football-ah chuan engpawh thleng thei a ni a, Mexican club hian Bayern hi an barakhaih ve thei tlat.

Knockout inlenaah chuan striker ṭha an pawimawh a, Tigres hian Andre-Pierre Gignac an kawl. French striker hian kum 2015 khan Mexican club hi a zawm a, Tigres tan goal 147 khung tawhin club record goal scorer a ni mek. Club World Cup-ah pawh Gignac hian goal thum a khung tawh a, top scorer a ni mek bawk.

Kum 35 mi Gignac hi European striker ṭha zinga sawi hman a ni a, amaherawhchu Mexican club a zawm avangin hriat a hlawh zui lo. Tunah erawh Club World Cup vangin a chanchin ngaihven a hlawh a, Mexico lamah hming lo chher hle. 

Kum 2020 aṭang khan match 38 khelin goal 31 a khung a, Puskas nominee-ah telh a ni a, CONCACAF Champions League final-a Los Angeles FC an hneh ṭumin minute 84-naah chakna goal a khung. Bayern pawhin nomawi chawi an duh a nih chuan Gignac hi an ngaihthah a thiang lo ang.