Steven Gerrard leh Rangers Engtikah nge an champion dawn?

English player ropui an sawi apiangin Steven Gerrard-a hming lam rik ni tawh dawn mah se a kalh tikim lotu a awm a, chu chu league nomawi a chawi lo kha a ni. 

Liverpool legend hian Reds tana a rinawm luatah Premier League nomawi chawi loin a career a mangṭha a, Merseyside club elpui fan-ten tun thlengin fiamthu thawh nan an la hmang ṭhin.

Mahse, Stevie G hian khelmual chhunga hruaitu ṭha a nih ang thoin khelmual pawnah pawh hruaitu ṭha a nihna a lantir chhunzawm a, player a nih laia a tih theih loh kha manager a nih hnuah ti thei dinhmunah a ding mek. 

Scottish Premiership-ah Gerrard-a enkawl Rangers chuan point 76 neiin table chung ber an luah mek a, anmahni hnaih bertu Celtic aia an sanna chu point 21 ngawt a ni.

Celtic hi nizan khan St. Mirren mualah an leng a, he thu ziak i chhiar meuh chuan an inthlauhna hi a danglam leh tawh ang. 

Scottish football roreltu chu Celtic an ni a, mahse an elpui ber ṭhin, milian mutthlu chu Steven Gerrard-a'n a kai harh a, insiamrem nan hun duh deuh mah se 2021 a herchhuah meuh chuan an inthlau ta hle. 

Chutihrual chuan football-ah chuang eng pawh thleng thei a ni a, Celtic thai bo bik hi a fuh lo mai thei - Celtic hian an khelh tlemna match hnih aṭangin point ruk nei ta se, Rangers hi vawi hnih an la hmachhawn dawn bawk. 

Rangers hneh ve ve bawk se, team pahnih inkar hi point kuaah sawr zim a ni ang a, point 24 hlawhchhuah tur a la awm bawk. Celtic tan beiseina a la awm tihna a ni. 

Mahse, Celtic tana buaithlak ta chu Rangers an che ṭha leh lutuk hi a ni a, Gerrard-a naute hian match 28 an khelh aṭangin tlawm an la nei lo a, vawi li an khingpui an inhnehtawkpui.

Celtic hian Old Firm derby-ah hneh ve ve ta pawh ni se, match li dangah Rangers hian point an hloh tel zui a ngai dawn bawk a, chutiang thleng tura hisap chu thil harsa a tling. 

Celtic-in champion theih dan an la nei a, thilmak a thlen an mamawh tel thung - tuna zawhna awlsam zawk chu, "Engtikah nge Rangers an champion ang?" tih hi a ni a, February-a champion theih dan an nei!

February-a Rangers champion tur erawh chuan Celtic hi an league match hmabak hmasa pathuma an tlawm vek a ngai - hetih chhung hian Rangers-in match khat chiah an nei thung. 

Rangers hian Inrinniah Kilmarnock hneh se, point 24-in hma an hruai fal ang a, Celtic-in point 27 chiah hlawhchhuah tur an nei tawh dawn bawk. Rangers hian February 21-ah Dundee

United an hneh zui chuan Celtic-in Ross County leh Aberdeen lakah point ruk an hlawhchhuah ngei ngei a ngai - a nih loh chuan Rangers an champion ang.

Celtic hian point ruk an hlawhchhuah erawh chuan Rangers hian March 3 an nghah thlen leh a ngai dawn tihna a ni - mahse, nizan khan Celtic hi an inlan a, an result hian Rangers champion hun tur a la ti danglam thei.

March 21-a Old Firm derby hian awmzia a nei lo thei bawk - chumi tur chuan team pahnih hi an hmabak match-ah chak vek se, March 6-a Rangers-in St Mirren an hmachhawn meuh chuan point 15-in hma an hruai fal ang a, Celtic tan point 18 chiah chuh tur a awm tawh bawk ang. Celtic hian March 7-ah Dundee United an ngam loh chuan Old Firm derby-ah champion sain Rangers an leng ang a, an hmelma kumhlun hi Celtic lam hian 'guard of honour' an pek a ṭul ang. 

Kum li liam ta khan Brendan Rodgers-a enkawl Celtic chu kum 88 chhunga league nomawi chawi hma ber an ni a, league match 30-naah an champion - game ni lo, a ni ang zawng chuan tuna Celtic boss Neil Lennon hnuaiah hian March 26, 2014 khan Celtic hi an lo champion tawh. 

Rangers hian kum 1929 khan league match 20% chiah khelh tur nei chungin league nomawi an lo chawi tawh a, 1899 leh 1900 khan 22% match chiah khelh tur awm chunga champion-in record an lo siam tawh bawk.

Rodgers enkawlna hnuaiah Celtic hian 2016-17 season khan tlawm nei loin league nomawi an lo chawi tawh a, tlawm la nei lo Rangers chu he dinhmun luah thei dinhmunah hian an ding mek. 

Celtic hian 2016-17 season-ah khan league match 28 hnuah point 80 neiin vawi 78 goal an khung a, vawi 17 chiah an lamah a lut - Rangers hian match 28-ah point 76 an nei mek a, goal 68 an khung a, an lamah goal riat chiah a lut. 

Martin O'Neill enkawlna hnuaiah Celtic hian 2003-04 season khan match hmasa 28 chu tlawm an nei lo a, league match ruk khelh tur a la awmin an champion tawh - mahse an match hmabak parukah hian vawi hnih an tlawm zui thung.