Federer hnehin Djokovic a tlang

Vawi sarih champion tawh Novak Djokovic chu set hmasa berah Roger Federer lakah 4-1 in hnufual mah se chiang takin a tho chhuak. Nimin tlai Australian Open semifinal-ah champion lai hian Federer chu darkar hnih leh minute 18 chhung lekin 7-6 (7-1), 6-4, 6-3 a hnehin final a lut.

Tennis player ropui pahnih te hi vawi 50 an intawng tling ta a, Grand Slam vawi 16 champion tawh Djokovic-a'n record nei ṭha zawkin vawi 27 a chak tling ta chiah. Major tournament bikah pawh 11-6 in hma a hruai fal.

World number 2 Djokovic hian a vawi riat nan champion a tum dawn, nomawi inchuhna inkhelah chuan Dominic Thiem leh Alexander Zverev te inkhela chak zawk chu Pathianni tlaiah a hmachhawn ang.

Seeded pahnihna Novak Djokovic-a'n kumin Australian Open-a match hmasa berah set khat a hloh nghal a, a hnu lamah erawh a insiamṭha; final thleng tur hian match ruk khel zuiin set a hloh nawn tawh miah lo.

Kum 32 mi Djokovic chuan, "Thil thlen dan kha danglam daih thei a ni, bul a rawn ṭan fuh avang khan ka chiai hman hle. Ka rilru put hmang ka thlak nghal thuai a, rilru fim tak pu chungin atana lak harsa turin ball ka vaw let ṭhin.

"Roger Federer a inlan thei kha a lawmawmin ka zah hle, a chet vel danah khan a taksa chu 100% in a dam vek lo tih ka hria," a ti. Swiss star hian quarterfinal a khelh khan ṭhal na vangin medical time out a la a, tun ṭumah pawh set khatna an khelh zawhin enkawl lailawk a ngai.

Djokovic (16 titles) hian Grand Slam champion hnem lamah kum 38 Federer (20) leh kum 33 Rafael Nadal (19) te a um mek, player pahnih hi an tla ve ve tawh. Australian Open bikah final vawi sarih a khelh tawhah a la chak vek avangin kuminah pawh a champion a rinawm.

Player ropui pahnih hi season hmasa khan Wimbledon final-ah an intawng a, Centre Court chhunga fans pungkhawm chu 'Roger, Roger, Roger' tiin an au rual - inkhel hmuhnawm takah Djokovic chuan hnehna changin 'Novak' tih ri chauh ka hria tiin a sawi zui.

Tun ṭuma an inkhelhna Rod Laver Arena erawh Djokovic lalna ram a ni a, nimin tlaia inkhel entu tam tak chu 'Nole! Nole! Nole!' tiin an aurual ve thung. Vawi sarih champion tawh Serbian tlangvalin set a lak lai leh hnehna a chan chiah chuan fans au thawm chu ring tak a ni.

Swiss star Federer hian Australian Open title hi vawi ruk ngawt a la tawh. Amaherawhchu, player lian dang pawhin ṭan rawn hlawhna hmun bik an nei ṭhin angin Melbourne Park hi chu Djokovic tana vanram tlafual a ni ve thung.

 Thil thlen dan

•    Federer-a'n service hmasa a, game hmasa ber a lak bakah Djokovic a chhuhsak zui nghal.

•    5-3 a nih hnuah Federer-a'n a service la se chuan set a la ang, mahse service a hloh.

•    Tie break an khelh hnuah Djokovic-a'n nuamsa takin set hmasa ber a la.

•    Set hnihna an khelh ṭan leh hmain Federer chuan medical time out a nei.

•    Set hnihnaah mahni service ve ve an la zel, service hmasa zawk Djokovic-a'n 5-4 a nih hnuah break sak lehin 6-4 in a tlang.

•    Set thumnaah Djokovic-a'n service hmasain a la, game 

thum a lakah hnuah Federer service chhuhsak lehin 4-2 in hma a hruai.

•    5-3 a hma a hruai hnuah Djokovic chuan a service zui, match point hmuin Federer-a ball vuak hnuhnung berin net a khum zawh loh avangin a chak.