Pliskova hneh loin Serena a tla

Australian Open hmeichhe singles semifinal khel tur a hriat ta - Petra Kvitova, Danielle Rose Collins, Karolina Pliskova leh Naomi Osaka te hming a lan laiin Serena Williams tan erawh hmun a awm lo.

Nimin khan quarterfinal match pahnih khelh niin, champion lai Serena hi Karolina Pliskova lakah 6-4, 4-6, 7-5 in a chak lo. Inkhel hmasa zawkah Osaka pawhin Elina Svitolina 6-4, 6-1 in a hneh ve bawk. Pliskova leh Osaka te hi final luh inchuhin an inkhel zui leh dawn a ni.

Serena Williams-i'n match point vawi li a hmuh a chhawr ṭangkai thei lo vek a, nikuma fatir pai chunga a champion tawhna hmunah semifinal a thleng zo lo hi vanduai vangah a ngaih theih.

Rod Laver Arena, Melbourne Park-a inkhelah world number 1 hlui Serena leh Kvitova ten set hmasa pahnih an insem. Set hnuhnung berah American nula hian 5-1 in hma a hruai fal thei a, nikum US Open final-a a ngam loh Osaka hmachawn turin a tlang ngei dawn niin a lang hman.

Mahse, kum 37 mi Serena hian a tawnhriat ngah tak a chhawr lo. Service laiin a ke a line a rah vanga fault a neih bakah rally hmuhnawm an neih hnuin a forehand chuan net a khum zo lo, double fault a neih bakah backhand hmanga tihsual lehin Kvitova tan beiseina a nung thar zel.

Czech Republic nula Kvitova a phur chhunzawm a, inrintawkna a neih thar a vangin game hnuhnung paruk la zawnin; darkar hnih leh minute 10 an inkhelh hnuah hnehna a chang a, a vawi khat nan Australian Open semifinal a khel dawn.

Grand Slam vawi 23 champion tawh Serena hian major title la hnem ber Margaret Court (24 titles) nih rual turin nomawi pakhat bak a mamawh tawh lo, chutih rualin nikum khan US Open final-ah a chak loh bakah Australian Open quarterfinal-ah a tla, atan champion reng hi thil awlsam a ni bik lo.

A kum tam deuh tawh mah se Serena hi a khelh fuh ni chuan world number 1 Simona Halep hneh turin a la ṭha tawk a, kumin Australian Open bikah pawh hian a match hmasa lam pathumah set hloh miah lo in a kal thei - mahse set thum khelh a ngaih erawh chuan a chau tih a lang.

Serena chuan, "5-1, 40-30 in hma ka hruai a, khatiang hnua chak loh kha chu ka la hre ngai lo. Beidawng duh miah loa khel tu Karolina khan fak a phu. Match point ka neih lai khan ka zauthau lo, ka khingpui khan sir tak takah ball vuak bakah aces a nei a, a service ṭhenkhat kha vuak let ngaihna awm lo a ni bawk," a ti.

Serena Williams hneha US Open nomawi a chawi hnuah Naomi Osaka chuan player hlauhawm a nih zia a pholang chhunzawm. Japanese player hian a vawi khat nan Australian Open semifinal a khel dawn a, atan thil thar a ni zel.

WTA Finals champion Elina Svitolina erawhin beiseina nei sang hle mah se, a nghawng leh dar vei lam na vangin Osaka lakah a ṭhat dan berin a khel thei lo. Ukrainian nula chuan, "100% a nih loh chuan a harsa, mahse a khaikhawmna erawh a khel ṭha zawk a ni," tiin chhuanlam a siam duh lo.

Grand Slam vawi khat champion tawh Osaka chuan, "Ngelnghet thei ang bera khelh kha ka tum a, player ṭha tak ka hmachhawn nachungin a inhliam hlauh kha a pawi hle, na nei chung pawh khan khelh a awlsam lo.

"Tun ṭumah hian thil tum lian tak pakhat ka nei, thinrim insum zawh loh ang kha neih loh ka tum a, ka ti hlawhtlingin ka hria. Match hnuhnung pahnihah khel ṭha tawk lo mah ila tuna ka khelh danah ka lungawi viau e," tiin a sawi.