Norway-ah Lianzuala kal dawn

Mizo rawlthar duhawm Lallianzuala Chhangte chuan Norwegian club Viking FK-ah trial a nei dawn a, a club khelh mekna Delhi Dynamos chuan an player hi trial neih an remtih sak tawh thu thuchhuah an siam a ni.

Kar hmasa lawkah khan Lianzuala hian Viking FK-ah trial a neih tur thu hi Indian media ten nasa takin an pholang a, mahse hetihlai hian Delhi Dynamos lam hian thutlukna an la siam lo a, Lianzuala hian engmah a la hriat loh thu Vanglaini a hrilh bawk. 

Mahse, Thawhlehni zan khan Delhi Dynamos hian Lianzuala chhuahtir an phal thu hi thuchhuah siamin an tarlang a, Lunglei rawlthar hian he thu hi Vanglaini a hrilh. 

Lallianzuala chuan, "Mizo mipuite min lo ṭawngṭaipui turin ka sawm takmeuh a ni," tiin Vanglaini hnenah a sawi a, Norwegian top division-ah football khelh ngei a duh. 

India tana vawi sarih inlana goal thum khung thei Lianzuala hian trial a paltlang thei a nih chuan Indian player Europe-a inkhel tawh zingah Mohammed Salim, Bhaichung Bhutia, Sunil Chhetri leh Gurpreet Singh Sandhu te hnung a zui dawn tihna a ni. 

Mizo player zingah Jeje Lalpekhlua chuan Scottish club lian Rangers-ah Sunil Chhetri nen trial an lo nei tawh a, Jeje hnuah Lianzuala hi Mizo footballer European top division club-a trial nei hmasa ber a ni ang. 

Delhi Dynamos hian ISL-ah February 7 khian NorthEast United hmachhawnin February 17-ah match an nei leh dawn chauh a, hemi inkarah hian Lianzuala hian Norway hi a pan dawn a ni.

Viking FK hi Norwegian club hlun niin an ram league-ah vawi riat ngawt an champion tawh a, Champions League leh Europa League lamah pawh an inlan tawh. 

Kum 2017 khan Norway-a football league sang ber Eliteserien aṭang hian an relegate a, mahse second division-ah champion lehnghalin tun season-ah an rawn kir. March 31 aṭangin Norwegian league hi khelh ṭan ve chauh tur a ni a, December 2019 thleng a awh dawn a ni.