Chhinga Veng elpui Trau chak lo

I League second division-ah Thawh-lehni khan Trau FC chuan an mikhual New Barrackpore Rainbow 3-2 in an hneh lo a, team pahnih hi Mizo club Chhinga Veng FC elpui an ni. Chhingcows hian January 25, Zirtawpni hian Kolkata club ṭha Mohammedan SC an mikhual dawn a, hnehna an chang a nih chuan hmahruaitu an ni thei ang.

Khuman Lampak Stadium-a inkhelah Trau FC-in Reisangmi Khodang hmangin minute 12-na lekah hma hruai mah se, Rainbow-in Sujit Sadhu (38'), Joel Sunday (50') leh Sujay Dutta (65') hmangin an lehthal. Manipur club hian Takhellambam Deepak Singh hmangin minute 83-naah siphurh sut ṭhen mah se inkhel a danglam phah lo.

Mizo club Chhinga Veng hi group C-ah Trau FC, New Barrackpore Rainbow, Mohammedan Sporting Club bakah ISL reserve pahnih ATK leh Jamshedpur FC te an awm.

Group khat aṭangin team hnihin final round an lut dawn a, ISL reserve pahnih erawh I League an khelh ve theih loh avangin tun round hi an tawpna tur a ni. An inkhelh tawhna thlirin final round inchuh team pali te an intluk tawk tih a lang a, match tin a hmuhnawm dawn a, a bik takin tun Zirtawpnia Mohammedan leh Chhingcows inkhel tur hi a hmuhnawm zual ang.

Chhinga Veng FC chuan an home match bika inkhel en man tur an tichiang tawh a, mi pakhat tan Rs 50 zel niin lei theih turin an zuar chhuak tawh. Inkhel en duh tan Y2Goal Agencies-ah ticket a lei theih a, a hmunah lei tur a awm bawk ang.

MPL club hian VIP ticket an siam bawk a, hei hi Rs 1000 man niin season ticket a ni nghal. VIP ticket hmang hian Chhinga Veng match zawng zawng 

ṭhutna ṭhaah a ṭhut theih ang.