Man United midfielder thar Fernandes

Manchester United leh Sporting Lisbon te chu Bruno Fernandes chungchangah inremna an nei ta a, he thu i chhiar meuh chuan Portuguese midfielder hi United player a ni tawh hial ang.

English club hian euro maktaduai 55 (£47m) an pe phawt ang a, kum 25 mi midfielder man hi a chet ṭhat dan a zirin euro maktaduai 80 (£67.6m) ah a pung chho thei dawn. Gunnar Solskjaer chuan, "Inremna kan nei ta hi ka lawm.

Tun hma aṭangin Sporting nen hian indawrna ṭha tak kan nei tawh ṭhin," tiin a sawi.

United hian tun hmain Sporting Lisbon aṭangin Cristiano Ronaldo (£12.24m  - 2003), Nani (£21.5m - 2007) leh Marcos Rojo (£16m -2014) te an lalut tawh a, Old Trafford-ah hming a la chher thei ang em tih chu hunin a hril ang.

Ole Gunnar Solskjaer chuan, "Contract han ziak se, transfer tifel ila, kan team-a a dinhmun tur kan sawi ang. Inkhel turin a inpeih tih erawh ka hria," tiin Fernandes chu February 1, Inrinni zana Wolves an mikhual hunah khel thei a nih thu a sawi.

Hetihlai hian Man-chester United defender Marcos Rojo chuan Argentine club Estudiantes chu loan-in a zawm dawn a, he thu buatsaih lai hian official-a puan chianna a la awm lo.