South Korea leh Qatar an chak Quarterfinal khel tur a hriat kim ta

Asian Cup 2019 quarter­final-a inhmachhawn tur a hriat kim ta a, Thawhlehni zan khan last 16 match hnuhnung berah South Korea leh Qatar ten hnehna an chang ve ve.

South Korea hian Bahrain chu hun pangngaiah 1-1 in inhnehtawkpui mah se extra time-ah goal khat khung belhin 2-1 in an hneh a, Qatar hian 1-0 in Iraq an hneh thung. 

Asia khawmualpuia a thiam pariat zingah hian Vietnam, Japan, China, Iran, UAE leh Australia te chu South Korea leh Qatar hma hian an lo lut tawh a, zaninah quarterfinal hi khelh nghal tur a ni. 

Zanin dar 6:30-ah Vietnam leh Japan-in semifinal luh an inchuh ang a, dar 9:30-ah China leh Iran an inkhel thung ang - a hmuhnawm dawn tih a chiang. 

Tottenham forward Son Heung-min hoa khel South Korea-in hamrik a rik rualin inkhel an thunun nghal a, mahse beisei loh zawk Bahrain chu hun ṭha nei hmasa zawk an ni thung. 

Group stage aṭanga India hnawt chhuaktu Bahrain tan hian Mohamed Jasim Marhoon leh Komail Hasan Alaswad te chuan hun an nei nghal a, mahse an hun ṭha neih an chhawr lo. 

South Korea lam hian ball an chang tam chungin Bahrain tlar­­­hnung inrem ṭha tak an ṭhiat hleithei lo a, chance hlauhawm tia sawi tur an nei mang lo - an reh hle. 

Minute 43-naah South Korea an lang zawk. Son-a ball pek ṭha tak chu Lee Yong chuan mual ding lam aṭanga tlanpuiin a pet a, keeper Sayed Shubbar Alawi chuan dang per mah se Hwang Hee-chan ke bulah tak a tla a, Hamburger SV forward tan khung a harsa lo. 

South Korea-in second half-ah game thih tir ngei tumin an nawr chhunzawm a, Hwang Ui-jo leh Hwang In-beom ten chance duhawm an rawn nei nghal - goal erawh an keng tel lo. 

Bahrain-in ball chang tam lo mah se an ngawi reng bik lo - counter attacking hmangin South Korea an nawr let reng a, Jamal Rashed Abdulrahman-a shot Taeguk Warriors keeper Kim Seung-gyu-a'n a dan sak chu a ṭha takzet. 

Hun tawp nan minute 13 chauh a awm tawh tihah South Korea an ṭang tlang zo lo - Mohamed Saad Alromaihi chuan Bahrain tan si phurh a rawn sut a, extra time khelh a ngaih phah. 

Minute 30 dang erawh Ba­hrain-in an tlin lo. Ju Se-jong, Lee Seung-woo leh Kim Young-gwon ten an hun ṭha neih an chhawr loh vek hnuah minute 105-naa Kim Jin-su goal tauh erawh dan rual a ni lo - 2-1 in South Korea an chak a, quarterfinal an lut. 

World Cup 2022 thleng tur an nih vang hrim hrim pawhin Qatar-in ngaihven an hlawh a, tun dinhmunah chuan he ram hian World Cup thleng tur khawpin football an thiam tih an la pholang ve zel.

Team ṭha Iraq-in inkhel bul an ṭan ṭha zawk chungin Qatar chu hun nei hmasa zawk an ni a, mahse Asian Player of the Year ni lai Abdelkarim Hassan chuan an hun ṭha neih hmasakah bar a tih per. 

Iraq lamin chance ṭha neih chhunzawm ve nghal mah se Qatari keeper Saad Al Sheeb a hunah tak a che a, Mohanad Ali hun ṭha neih tur a khawhral sak. Iraq midfielder pawimawh Humam Tareq chu minute 36-na lekah lakchhuah a ngai a, Iraq an vanduai dawn niin a lang. 

Minute 62-na a ni a, goal mawi bik kan hmu - Bassam Al-Rawi chuan Qatar tan freekick hmangin mawi zetin a khung a, Iraq keeper Jalal Hassan tan dan theih a ni lo - Qatar tana goal khungtu Al-Rawi hi Iraq-a piang, Qatar tana khel a ni!

Asian Cup-a a thiam pariat zingah Vietnam chu group stage-a pathumna zinga quar­terfinal lut awmchhun an ni a, he team hian zanin dar 6:30-ah Japan an hmachhawn dawn. 

Vietnam hi Asia khawmual­puia football-a ram ṭhangduang ber pawla sawi an ni a, last 16-ah Australia hnehtu Jordan an hnawhchhuah bawk avangin Japan tan zuam sual theih an ni ang. 

Zanin dar 9:30-ah China leh Iran an inkhel dawn a, he inkhel tur pawh hi an result tur hriatthiam a harsa hle. China hian Asian football powerhouse tia sawi zingah South Korea chiah la hmachhawn chungin quarterfinal an lut a, Iran hi an tan chak loh theihna tur an ni ang.

Iran hi tlawm la nei miah lo chunga quarterfinal lut an ni a, Rubin Kazan striker Sardar Azmoun, Wolfsburg midfielder hlui Ashkan Dejagah leh Brigh­ton & Hove Albion winger Alire­za Jahanbakhsh neitu an ni a, China tan fimkhurna tur an ni.