Bolt-a'n football a chawlhsan!

Tlan chak hmingthang Usain Bolt chuan intlan­siak a chawlhsan hnuah professional footballer nih tumin theihtawp chhuah mah se a tlan chak ang maiin a football career pawh a tawp chak - football a chawlhsan thu a puang. 

Kum 32 mi Jamaican sprinter hian A League club Central Coast Mariners-ah thla hnih chhung training-in hun a hmang a, mahse club hian Bolt an lakluh nana sum lam pui thei an hmuh loh avangin November khan a chhuahsan. 

Mariners tana a match hmasa bera friendly-a goal hnih khungtu Bolt chuan, "Hun tawite mah ni se a hlim­awm," a ti a, "Ṭha takin thil kan kalpui lo ka ti dawn lo a, mahse kan duh­dan erawh a ni lo," tiin a beisei aia a football career a tawp hma thu a sawi.

Maltese club Valletta-in sawm mah se a hlawh phut zat an pek theih loh avanga hnartu Bolt chuan, "Engkim hi zirlai vek a ni a, ka tan chuan tawnhriat ropui tak a ni," tiin a football career chungchang a sawi. 

Sumdawnna lama a rilru a sen tawh tur thu sawitu Bolt hian Norwegian team Stromsgodset leh German club ṭha Borussia Dortmund-ah te pawh training a nei hman a ni.