West Ham pawisa an chawitir
Premier League club West Ham chu an khelmuala inkhel entu an thunun tawk loh avangin, England football thuneitu sang ber Football Association chuan £100,000 chawi turin an hrem.
March thla khan Hammers hian London Stadium-ah Burnley an mikhual a, he inkhelah hian vawi khat aia tam khelmualah fans an tlan lut. Fan pakhat chuan captain Mark Noble lam a pan bakah, ṭum khat dang chu corner flag bulah an lut bawk.
Fans hian nungchang mawi lo an lantir bawk a, khelmual chhungah pawisa thir leh thil dang an thehlut bawk. Club neitu zinga mi David Sullivan leh David Gold te chu an him zawk nan director box aṭangin an kalsawn tir hial. He thil thleng avang hian West Ham chuan an fans ṭhenkhat chu an dam chhunga an club inkhel en thei lo turin an lo hrem tawh.
Hammers captain Noble chuan, "Thil rapthlak" tiin fans chetdan chungchang a sawi tawh a, club vice chairman Karren Brady pawhin an hun tawna fuh lo leh hrehawm ber pakhat a nih thu a sawi ve hial tawh bawk a ni.