Intlansiak vawi 19 awm leh dawn

Bike intlansiakna sang leh ngaih­hlut hlawh ber MotoGP season thar an tlan dan tur chu tih chian a ni leh ta a, nikum Sep­tember thlaa an lo ruahman lawk tawh angin intlansiak vawi 19 a awm dawn a, season hmasa nen an tlan zat a inang leh dawn.

Intlansiak hmasa ber hi March 10 hian Losail, Qatar-ah neih tur niin; Argentina GP leh Americas ten a zui hnuah Europe-ah an tlan chhunzawm ang - a hnuhnung ber chu November thla hian Valencia, Spain-ah neih a ni ang.

MotoGP team tinin inbuatsaihna an kalpui mek a, February 6-8 hian Sepang, Malaysia-ah test races neih tur niin, he hunah hian hliam vangin vawi thum champion tawh Jorge Lorenzo chu a inlan ve thei dawn lo.

Kum 31 mi Lorenzo hian season thar aṭang chuan champion lai Marc Marquez nen Honda bike an khalh dun dawn a, champion thei tura ṭha pahnih an nih bakah driver pahnih inel tur hi MotoGP ngainatute hmuh chak a ni.