Zaninah League Cup final khel tur zawnna Chelsea Vs Tottenham Hotspur

Carabao Cup semifinal second leg chu zanin dar 1:15 hian Stamford Brige-ah khelh a ni dawn a, Chelsea-in Tottenham Hotspur an mikhual ang. Wembley Stadium-ah first leg khelh a ni tawh a, Spurs hian 1-0 in hnehna an chang.

League Cup semifinal hi double leg a khelh ṭhin a ni a, minute 180 khelh hnua an la inhnehtawk a nih chuan extra time khelh a ni ṭhin. Tun ṭumah erawh dan thar an hmang tawh a, minute 180 zawhah an la inhnehtawk a nih chuan penalty shootout neih nghal tur a ni tawh dawn a, away goal rule a awm lo.

Chuvangin zanin hian minute 90 chiah khelh tur an nei tawh a, mualneitu Blues hi goal khata an chak zawk a nih chuan penalty shootout hmuh tur a awm ang.

Tottenham Hotspur-in Manchester United an mikhual khan Son Heung-min tan Asian Cup hmaa match hnuhnung ber tih a chiang tawh a, hun tawp hma chiaha Harry Kane inhliam erawh beisei lawk loh thil thleng a ni.

Spurs-in an captain hi March thlaah an chhawr leh thei dawn chauh tih an hriat hnu lawkah Fulham an tlawh a, hnehna chang mah se Dele Alli chu hliam vangin lakchhuah a ni. English midfielder malpui hliam hi enfiah a nih hnuah March thla tirah a rawn let leh chauh dawn. 

Asian Cup lamah South Korea-in quarterfinal an thleng a, Son an la chhawr thei lawk dawn lo. Spurs-in Chelsea hmachhawn turin an chhuanvawr pathum Kane, Alli leh Son te an chhawr thei dawn lo tihna a ni a, anni pathum hian tun season League Cup-a Tottenham goal riat khung zinga goal ruk an khung.

Spurs hian Thlasik bazarah risk lain sum hman an tum bawk si lo a, Mousa Dembele chu Guangzhou R&F-ah an chhuahtir a. London club hian AZ Alkmaar aṭanga pound maktaduai 17 zeta an lakluh Vincent Janssen pawh Burnley lakah pound maktaduai 15-in hralh an phal tih thawm a awm a, Fulham an hneh ṭuma chakna goal siamsaktu Georges-Kevin Nkoudou pawh tun transfer-ah chhuah an phal tih a awm bawk.

Maurico Pochettino hote hian hun harsa an tawng mek a, hliam vangin Moussa Sissoko leh Victor Wanyama te an la hman theih dawn loh bawk avangin Chelsea nen hian chhawr theih player-te an hman thiam a ṭul dawn a ni.

Football-ah chuan goal khat hi chak pui tham an ni a, Tottenham-in goal khat an nei an sa. Stamford Bridge-ah goal khat hi an hum thei a nih chuan Wembley Stadium-ah champion lai Manchester City an hmachhawn thei ang. 

Tottenham hian 2007-08 a League Cup nomawi an chawi hnuah an la champion leh lo a, Pochettino hnuaiah nasa takin hma sawn mah se nomawi a la tel loh avangin inelna hi an lak thu tak a ṭul a, tun hi an tan hun ṭha a ni.

Argentine manager Poch tana thu lawmawm chu Lucas Moura a dam a, Brazilian forward theihna sang tak hian an buaina tlarhma lam chu eng emaw chen a siam ṭhat theih a rinawm. Tlarhnung lam erawh an dam kim a, keeper leh captain Hugo Lloris hoin hnehna chan ngei an tum ang.

Manager Maurizio Sarri hnuaiah Chelsea-in bul ṭan ṭha viau mah se tunah erawh Manchester City leh Liverpool te league lamah an elpha lo niin a lang a, supporter tam takin Italian manager lakah rinna tak tak an nghat ngam lo. 

Blues manager kal chhuak ta Antonio Conte-a'n Premier League a champion pui zawha FA Cup-a nomawi a chawi chunga a hna a chan a nih chuan Sarri dinhmun pawh hi a nghet bik lo ang. An player zinga ṭha ber tiha chhal theih Eden Hazard-a'n club chhuahsan lam hawi zawngin ṭawngkam a nei ve reng a, Chelsea hian Spurs kim lohna an hmang ṭangkai thei lo a nih chuan an buaina neih mek hi a pun lun chho ang.

Hazard chuan, "Ka manager hrawn te beisei ka phak ṭhin lo. Tunah pawh Sarri ka tih hrilhhai mek a, Mourinho ka ti hnual tawh bawk. Anni chuan goal tam zawk khung turin min beisei a, coach thar pawh rawn kal se an beisei ka phak chuang lo ang," tiin a sawi a, Belgian forward hian chhuah a hreh lo niin a lang.

ṭha neih erawh nuam a la ti reng a, Chelsea forward chuan, "Chak loh hun chu a awm a, Tottenham nena kan inkhelh ṭuma kan chak loh dan khan pawi kan ti tlang hle. Chutihrualin a nihna tak thlir chuan kan khelh dan a lungawi thlak thung a, chu coach ngaihdan pawh a ni," tiin a sawi.

Tottenham nen an inkhelh hmasak ṭum hian VAR hmangin Spurs-in penalty an hmu a, Kane-a'n goal-ah chantirin first leg bika goal awmchhun a ni.