Australian Open Semifinal-ah Djokovic

Tennis world number 1 Novak Djokovic chuan Kei Nishikori 6-1, 4-1 a hnehin Australian Open semifinal a lut a, Zirtawpni chawhnu lamah Lucas Pouille nen an inkhel leh ang.

Rod Laver Arena, Melbourne Park-a inkhelah Serbian tlangval hian bul a ṭan ṭha hle, US Open final pawh khel tawh Nishikori chu set khatna a khelh zawhin a malpui hliam enkawl a ngai, set hnihna a khelh laklawh laiin umpire hnenah a inkhelh chhunzawm theih tawh loh thu a hrilh.

Japan tlangval Nishi-kori hian quarterfinal lut tur hian court chhungah darkar 13 leh minute 47 hun a hmang tawh a, match li a khelh tawh zinga ṭum thum ngawt chu set nga a khelh a ngaih avangin, a hliam dam hnuah duhthusamin a taksa a la inpeih lo tih a lang chhuak.

Mipa player zinga Australian Open vawi sarih champion thei hmasa ber nih tum Djokovic chuan, "Nishikori-a nen hian kan inkhel fo tawh a, a hliam kha na tak a nih loh hram ka beiseiin dam leh thuai turin duhsakna ka hlan," tiin a sawi.

Nimin inkhel pakhat zawkah Lucas Pouille chuan amah aia rinkai zawk Milos Raonic chu 7-6 (7-4), 6-3, 6-7 (2-7), 6-4 in a hneh ve bawk a, French player hian Grand Slam inelna bikah semifinal a vawi khat thlenna a nih avangin Djokovic paltlang chu a awlsam lo mai thei.

Seeded 28-na Pouille chuan, "Australian Open khelh hma khan tun season chhunga ka match khelh hoah hnehna chan ka nei lo, tunah erawh semifinal ka thleng ta. Hopman Cup-a ka chak loh hnuah khan zawi muanga insiamrem ka tum a, a hlawhtlinna kan hmu chho mek," tiin a sawi.

Vawiin tlai dar 2:00 hian Australian Open mipa singles semifinal hmasa zawk khelh tur a ni a, world number 2 Rafael Nadal leh Stefanos Tsitsipas ten final luh an inchuh dawn.

Kum 32 mi Nadal hian set hloh miah loin quarter-final thleng a paltlang thei, inrintawkna a neih san vanglai a ni. Mahse, a khingpui tur Greek tlangval hi Roger Federer hnawt chhuaktu a nih avangin awlsam taka nuai liam mai theih a ni bik lo ang.