Mite ngainat pa ṭha - Emiliano Sala

Emiliano Sala chu kum 28 a tlinin hlawhtling tura rim taka hna a thawh rah seng chhoin khawvelin a chanchin an hre ṭan a. Premier League club Cardiff City chuan an player manto ber ni turin an lalut a, amaherawhchu Argentine forward chuanna thlawhtheihna Piper Malibu chuan Wales khawpui a thlenpui zo lo.

Thlasik bazar a reh ruih a, player langsar hming a ri meuh lo. Cardiff City-in an lakluh Sala hi football ngainatute chil tiput pha a ni lo a, a chhuahsan tak Nantes erawhin a ui hle a, Welsh club-in an nghakhlel thung.

Thlawhtheihna chesuala a tel vel takah erawh Sala chanchinin ngaihven a hlawh a, khawvel titi a tling. October 31, 1990 khan Emiliano Raúl Sala Taffarel hi Argentina khaw pakhat Cululú-ah a piang a, Argentine naupang dang ang thoin Gabriel Batistuta chu a ngaihsan ber leh entawn a ni.

A naupan tet aṭangin football a khel ṭan a, kum li mi a nih aṭanga kum 15 a nih thlengin San Martín de Progreso tan a khel a. Scout hoin an hmuh fuh zarah Proyecto Crecer school zawm turin San Francisco, Córdoba-ah a insawn a, he school hi Spanish club RCD Mallorca leh French club Bordeaux nen an inthlun zawm.

Sala hian Italian passport a nei a, kum 20 mi a nihin Bordeaux hi a zawm. France-ah hian Argentine mi tho an youth coach Marcelo Vada bulah khawsain an fapa Valentín Vada nen chuan team khatah an awm bawk. Khelhna hmun chang turin loan-in Ligue 2 club US Orléans-ah kaltirin hetah hian match 37-ah goal 19 a khung a, an manager Oliver Frapolli chuan a player ṭha ber a nih thu a sawi.

Hemi hnu hian Niort-ah te loan in a kal leh a, goal a khung ve zel bawk. Bordeaux manager Willy Sagnol chuan 2014–15 season-ah  first team-ah a telh a, amaehrawhchu khelhna tam zawk a neih theh nan Caen-ah loan-in a kal. Kum 2015-ah Sala hian FC Nantes chu euro maktaduai khatin a zawm a, season khatnaah goal ruk a khung chungin club top scorer a ni nghal. 

Season liam ta khan Leicester City champion puitu Claudio Ranieri hnuaiah a khel a. Tun season ṭantirh khan manager thar Miguel Cardoso chuan ring zo loin Kalifa Coulibaly a ring zawk a, hei vang hian Galatasaray zawm tum mah se a tlawlh. Sala hian substitute aṭanga lutin ṭum hnih goal a khung avangin starting eleven a chang chho leh a, manager Cardoso an ban hnuah Vahid Halilhodzic hnuaiah harhtharna tak tak a chang.

Sala hian tun season Ligue 1-ah goal 12 a khung hman a, Premier League club a zawm hma hian a tluk loh chu Kylian Mbappé leh Nicolas Pepe te chauh an ni.

Sala hian thiamna kawngah chuan zir tur tam tak a la nei a, amaherawhchu 6 ft 2 in zeta sang a nih avangin a lian a, a chak tel bawk a, a huaisen bawk avangin hmabak a nei êng hle. A chanchina an sawi uar lai ber chu midang ngainat ze ṭha a nei hi a ni.

Pa ngawi chawi tak a ni a, lehkhabu chhiar ngaina mi niin detective chanchin lam chu a ngaina zual a, khualmuala an inkhelh dawn chuan lehkhabu chhiar tur a keng tel ngei ngei ṭhin.

A khelh dan hmangah chuan Jamie Vardy nen an khaikhin a, a tlan chakna chu counter attack nan a ṭha a, hmun awl zau pek chi a ni lo. Loan-a a khelhna French club Niort-ah erawh 'tualchhung Carlos Tevez' an ti thung a, box chhunga a fin vang a ni.

Sala hi a kalna apiangah an ngaina a,  Caen tana a khelhpui Felipe Saad chuan, "Football hi team angin an khel ṭhin tih a pawm a, a thil phal a, mi ngainat a hlawh hle. A chunga thil thleng hian min nghawng tak zet a ni," tiin a sawi.

Nantes-a amah enkawl tawhtu Claudio Ranieri pawhin, "France rama kan thawh dun lai khan a theihna zawng zawngin a khel ṭhin. Entawntlak nungchang a nei a, tlawm duh lo pa huaisen a ni," tiin a fak.

Sala hian Cardiff a pan hmain Nantes-a a khelhpuite a tlawh a, Instagram-ah chuan a 'A tawp nan, mangṭha' tih a ziak. Argentine forward mangṭha hi tuna amah khawvelin a mangṭha dan ang hi chu a ni lo.

Kum 28 mi Sala hi hlawh leh transfer fee tam zawkin Chinese club-in an sawm a, amaherawhchu a khelh châkna em em Premier League club-a khelh a thlang. A football career-a a thlen san lai ber zuih ral dan erawhin football ngainatute chauh ni loin khawvel mipui a vel. Sala chuanna thlawhtheihna hi hmuh a la ni lo a, a thih thu nemngheh a la ni lo a, amaherawhchu beisei erawh a bo thung.

Sala hian thlawhtheihna aṭanga a thu thawn hnuhnung berah chuan, "In dam ṭha hlawm em? Darkar khat leh a chanve hnua chanchin dang ka rawn neih loh chuan min zawng tur in rawn tirh hial a ṭul ang. Ka hlauthawng takzet a ni," tiin a ṭhianpa a thawn a, a khawngaihthlak takzet.

Unau ang maia a sei len pui Valentin Vada chuan, "Unaupa, lo lang hlawl teh" tiin twitter-ah a ziak a, an tuar thiam thei lo. Mizo hla thuin 'Aw enga’n nge maw Khuanu hian, Hringnun hi a lo duan le?, Thamral leh mai tur hian em ni le?' tia zawhna a lo siam kha inzawh nawn a ṭul leh ta.