Premier League club hneh vektu Liverpool

Nilaini zan khan Liverpool chuan Premier League inkhelah West Ham United an lenchilh a, an mikhualna ramah 2-0 in an chak - Premier League-a an inelpui team 19 chu an hneh vek tawh tihna a ni!

Liverpool tan Mohamed Salah chuan penalty hmanga goal a khung bakah Alex Oxlade-Chamberlain chuan goal khat a thawh ve bawk a, league match 24 an khelhah Reds hian ngamtu an la tawng lo. 

Jurgen Klopp-a nauten anmahni hnaih bertu Manchester City aiin point 19-in an hmu hnem zawk a, season hmasa nena chhiar telin league match 41 zet chu tlawm loin an kaltluang ta. 

Reds manager Klopp erawh fimkhur taka ṭawngin, "Hna kan la thawk zawk lo a, thawh tur tam tak kan la nei. Ka tiam a che u, tunah chuan Inrinni zana Southampton kan mikhual tur chiah ka ngaihtuah," a ti. 

Relegate thei dinhmuna ding West Ham-in Liverpool chelh an tum a, minute 30 vel thleng chu Hammers hi an tumah an hlawhtling dawn niin a lang a, Reds-in chance an nei hleithei lo. 

Mahse, Hammers an khel ṭha dawn chauh nia a lan laiin Issa Diop a chesual a, penalty a chawi. Liverpool tan Mohamed Salah chuan harsatna nei miah loin penalty hi goal-ah a chantir a, target-a shot an neih hmasak berah goal an khung. 

London club tan Manuel Lanzini leh Robert Snodgrass ten hun duhawm an hlah hnuah Liverpool bawk an inlar leh a, Chamberlain chuan minute 52-naah an goal hnihna a khung ve leh. 

Liverpool hi an match hnuhnung pathuma Tottenham, Manchester United leh Wolves an hneh ṭum ang thoin an khel ṭha lo a, mahse khelh ṭhat loh lai pawha chak ṭhin hi champion zia a ni si. 

Premier League-ah match 14 chauh khelh tur a awm tawh a, Reds-in point 19-a hma an hruai fal bawk avangin an champion ngei a beiseiawm ta hle - match 24-ah point 70 an nei thei a, heti zat point nei tura English top flight football-a match mamawh tlem ber an ni. 

Liverpool tan nomawi a hnai a ni satliah lo - tun ang renga an kal chuan record pawh an siam chhoh zel a rinawm. Mahse, Klopp erawhin record chu a rilru luahtu a nih loh thu a sawi.

German coach chuan, "Point 70 kan nei tih ka hria a, number duhawm tak a ni. Mahse, thil tam tak a la thleng thei a, record lamin min tibuai lo. Borussia Dortmund  ka enkawl lai khan record ka siam a, a season lehah Bayern Munich-in an thaichhe leh mai mai," a ti a, record a ngai pawimawh lo. 

West Ham manager David Moyes chuan, "Everton leh Manchester United manager lo ni tawh tan chuan thil sawi nuam tak a ni lo a, mahse he Liverpool team hi an ṭha takzet a ni," tiin an ngam loh team a fak.