Coppa Italia Eriksen hoin Inter-in semifinal an lut
Inter Milan tana Christian Eriksen a inlan hmasak berah Antonio Conte hoten Nilaini zan khan Fiorentina 2-1 in an hneh a, Coppa Italia semifinal an lut. Final khel tur zawnna hi double leg-a khelh tur a ni a, Inter hian Napoli an hmachhawn ang a, semifinal pakhat zawkah AC Milan leh Juventus te an inkhel ang.
San Siro-a inkhelah Antonio Candreva hmangin Inter-in first half-ah hma an hruai a, Martin Caceres hmangin Viola-in sut mah se Nicolo Barella-a'n Inter Milan chakna goal a khung.
Conte team
Antonio Conte-a'n a hming chher tawhna Italian football-ah ropui nawn tumin Inter Milan a din thar a, Italian club hian hming langsar seng khawmin English club-a player an langsar hle.
Nipui transfer khan Man-chester United aṭangin Romelu Lukaku an lakluh bakah loan hmangin Alexis Sánchez an lalut. January tranfer-ah Ashley Young leh Christian Eriksen te an lalut a, loan hmangin Chelsea aṭangin Victor Moses an la tel.
Coppa Italia-ah hian Alexis, Lukaku leh Young ten bul an ṭan a, Moses leh Eriksen te bench aṭangin an lut leh bawk.
Inter an chak
Inkhelh ṭantirhah team pahnihin chance siam an harsat a, minute 44-naah goal hmasa ber a lut chauh. Inter forward Lautaro Martinez chelh an tumna lamah Federico Ceccherini leh goalkeeper Pietro Terracciano te an insu buai a, Candreva-a'n a per chu goal-ah a chantir.
Second half-ah Inter khel a nung chho a, Lautaro Martinez, Alexis Sanchez leh Matias Vecino ten chance ṭha an hloh. Antonio Conte hoten inkhel thunun mah se Fiorentina-in corner hmang
ṭangkaiin Martin Caceres tauhluh hmangin minute 60-naah siphurh an sut.
Inter-in player thar Christian Eriksen an dahlut a, mualneituin goal an khung zui nghal. Fiorentina-in an ball clear ṭhat loh tuarin Nicolo Barella-a'n minute 67-naah a volley goal a, chakna goal a ni zui bawk.
Inter Milan manager Antonio Conte chuan, "Chak kan phu a, semifinal kan khel tur hi ka lawm. Midfield-ah harsatna kan neih avangin loh theih loin Eriksen kan luhtir a, a theihna sang tak kan hmu nghal. Kan bulah a awm rei ang a, kan duh dan a hre chhho zel ang," tiin an result-ah a lawm thu a sawi.