Meghalaya taxi operator-ten fuel man tihhniam belh phut

Meghalaya sorkarin petrol leh diesel-a chhiah a lak Rs 2 ve vea a tihhniam tawh hnuah, Meghalaya-a commercial vehicle neitute chuan fuel man la tihhniam beleh turin an phut. An thil phut hi sorkarin a tihhlawhtlin loh chuan nawrh huaihawtah an vau bawk. 

Meghalaya Joint Action Committee of Commercial Vehicles (MJACCV) hmingin Nilaini khan taxi operator-te chuan sit-in protest an  huaihawt a ni. Fuel man tihhniam phut vangin February 3 aṭang khan commercial vehicle-te chu an tlan tawh lo. 

Driver leh motor neitu pawlte chuan fuel man sang mah se motor chuan man tihsan chu mirethei leh harsa zawkte thlenga a nghawng dawn avangin fare an tisang thei lo tih an sawi a, hei vang hian state sorkar chuan fuel-a chhiah a lak bakah, vehicle tax dang leh Covid-19 chhiah a lak ṭhin chu tihniam zawk tura an duh thu an sawi. 

MJACCV chairman Wandonrok Jyrwa chuan fuel man sang hian motor neitu leh driver-te chauh a nghawng lo a, society pum a nghawng a ni tiin, a man a san chuan thingtlang lama chengte tan khawpuia zin a harsa a, damlo inenkawl tur pawhin kal an harsat phah a ni, a ti. Hei bakah hian fuel man to hian thlai leh nitin khawsakna atana mamawh thlengin a tihto phah bawk tih an sawi.