Ogbeche ropuina hliahtu Lianzuala

Inrinni zan Indian Super League inkhelah Chennaiyin FC chuan 6-3 in Kerala Blasters an hneh a, mualneitu Blasters tan Bartholomew Ogbeche chuan hattrick siam mah se Lallianzuala Chhangte-in goal hnih a khung ve avangin Chennai club an chak. 

Chennaiyin hian goal ruk khung mah se goal khungtu erawh player pathum chauh an ni - Lianzuala bakah Rafael Crivellaro leh Nerijus Valskis te chuan goal hnih ve ve an khung ve bawk a, Ogbeche hattrick chu engmah lo maiah an chantir. 

Kochi khawpuia inkhelah Chennai club hian 4-1 in hma hruai hman mah se Ogbeche hian a theihna pholangin goal hmasa ber a khung hnuah goal hnih dang a rawn khung leh a, 4-3 a ni hman. 

Mahse, Lianzuala leh Valskias ten Chennaiyin tan goal an rawn khung belh leh a, hun a tawp meuh chuan 6-3 in Chennai club an chak. 

Lunglei tlangval Lallianzuala Chhangte hi Hero of the Match-ah thlan a ni a, amah ang thoa Chennaiyin tana khel Jerry Lalrinzuala chuan Emerging Player of the Match chawimawina a dawng thung. 

Chennaiyin tan hian Laldinliana Renthlei chuan inkhel bul a ṭan ve bawk. Blasters lamah Lalruatthara chu bench lamah a awm tluan a, minute 84-naa lut Samuel Lalmuanpuia'n Blasters tan danglamna a thlen hman lo. 

Nizan ISL-ah Jamshedpur leh ATK an inkhel a, Nilaini zana FC Goa-in Hyderabad an mikhual leh hma chu ISL match a awm rih lo ang.