Halep hnehtu Muguruza

Garbine Muguruza chuan season bul a ṭan fuh chhawm nung zelin Australian Open final a in vaw kai. Inrinni tlaiah Sofia Kenin nen a thiam ber nih an inchuh ang, kuminah champion thar kan hmu ngei dawn tihna a ni.

Melbourne Park-a semifinal inkhel hnuhnung zawkah Muguruza hian champion tura rinkai Simona Halep chu 7-6 (10-8), 7-5 in a hneh a, seeded chang phak lo Muguruza tan seeded palina Halep hneh hi chanchinṭha a tling.

Spain nula Muguruza hian French Open (2016) leh Wimbledon (2017) te a chawi tawh, a hnu lamah erawh beisei a phak chhunzawm ta lo. All England Club-a title a lak hnuah tun ṭum hi Grand Slam final a luh lehna hmasa ber a ni.

World number 32 chuan, "Final ka thleng leh ta hi ka hlim, he hun thleng leh tur hian ka nghah rei a ngai khawp mai. Ka khel ṭha lo rei a, besei phak loa tlak chang ka ngah, chumi hnuah hun ṭha ka nei ve leh ta hi a lawmawm takzet," a ti.