Mohammedan hmaah Chhinga Veng fiahna

Vawiin tlai dar 2:00 hian Chhinga Vengin Rajiv Gandhi Stadium, Mualpuiah Moham-medan SC an mikhual dawn. Mizo club hian hnehna an chang a nih chuan I League Second Divison khelh mekah group hmahruaitu an ni thei ang.

Chhinga Veng FC hi Mizo coach Lalsangzuala Hmar-in a enkawl a, India ram inelna sangah Mizo coach an ṭha tawk em tih  fiahna a ni dawn. Tun hmain Mizo coach K. Malsawmkima hoin Aizawl FC chu I League-ah an inpet tling tawh a, amaherawhchu hemi ṭum hian I League Second Division hi hmun khatah an khel a ni.

Tunah chuan home leh away in inelna hi kalpui a ni tawh a, I League nen kalphung a inang tawh. Mizo club hmachhawn tur hi Kolkata big three zinga sawi tel ṭhin Mohammedan SC an ni a, East Bengal leh Mohun Bagan ang thoa ṭantu ngah an ni. Asia ram club upa ber zinga mi an ni a, kum 128 zeta upa an nih tawh avangin Chhingcows nen an inkhel tur hi en a châkawm tawh hle.

Chhingcows coach Lalsang-zuala Hmar chuan, "Mizo coach te hian India ram inelna sanga club enkawl tur hian theihna kan nei a, kan team enkawl pawh hi club hlun zawk hmachhawn turin ka ring tawk khawp mai," tiin Vanglaini a hrilh.

Chhinga Vengin Aizawla an inkhelh hma hian khualmualah match hnih an khel tawh a, match hmasa berah New Barrackpore Rainbow nen goal awm loin an inhnehtawk a, hemi zawh hian Jamshedpur Reserves chu 1-0 in an hneh. 

Sanga hote hi an khelh tawhnaah an chungnung bik lo a, chuvangin an muala an khelhah hunah hnehna an chan theih nan ṭantu an mamawh. Tun ṭuma Chhingcows hi MPL khelh zawh taka pahnihna ai khan an ṭha zawk a, I League Second Division khel tur hian MPL club dang aṭangin Lalliansanga, Ṭhasiama, Imanuel HS Lal-

ṭhazuala, MC Malsawmzuala leh Vanlalbiaa Chhangte te an lak belh a. Foreigner pawh Ghana defender Godwin Quashiga te pawh an nei a, amaherawhchu coach hian an match hmasa pahnihah chuan Mizo player chungah rinna a nghat.

Chhinga Veng coach Sanga chuan, "Kan tan chuan I League Second Division hi a vawi khatna a ni dawn a, player-te pawhin pressure an nei thei a. Chutih-rualin a vawi khatna avang hian kan phur thei bawk a, ṭantu kan neih ṭhat chuan ṭha lehzualin kan khel thei ang," tiin Vanglaini a hrilh.

Mizo club hi group C-ah Trau FC, New Barrackpore RAC, Mohammedan Sporting, ATK Reserves leh Jamshedpur Reserves nen an awm ho a, group khat aṭangin pahnihin final round an lut ang.

Nilaini khan ATK Reserves chuan 2-0 in Jamshedpur Reserves an hneh a, ATK hi he group-ah hian hmahruaitu an ni mek. Amaherawhchu ISL reserve team pahnih hian final round an lut thei lo a, chuvangin Chhinga Veng elpui chu club dang pathum zawk hi an ni.