Emiliano Sala sulhnu hmuh a la ni lo

Cardiff City player manto ber Emiliano Sala chuanna thlawhtheihna chu nimin thleng khan hmuh a la ni lo a, Argentine forward leh pilot David Ibbotson te chu nung dama hmuh an beiseiawm tawh lo.

Thawhṭanni zan khan Sala hi Nantes aṭangin Wales khawpui Cardiff panin thlawhtheihna te engine pakhat hmang chiin an chhuak a, English channel chung zawna an thlawh laiin biak pawh theih an ni lo. Ni thum chhung zawn a ni tawh nachungin thlawhtheihna hnu hma hi hmuh a la ni lo a, an zawng chhunzawm zel dawn em tih hi he thuziah lai hi an chiang lo.

Guernsey harbour master captain David Barker chuan, "Nung dama hmuh hi a beiseiawm tawh lo a ni ber," tiin a sawi a, Channel Islands Air Search chief officer John Fitzgerald pawhin, "Khawvela mihring fitness ṭha ber pawhin darkar tam an daih lo ang," tiin a sawi ve bawk.