Zaninah en châkawm Arsenal Vs Man United

FA Cup-a sulhnu nei ṭha pahnih Arsenal leh Manchester United te chu zanin dar 1:25 hian Emirates Stadium-ah an inkhel dawn. Gunners hi Chelsea hneh zo hlim an ni a, United hi Ole Gunnar Solskjaer hnuaia vawi sarih chak zawn tawh an ni ve bawk.

Arsenal manager Unai Emery chuan, "Player ngai reng ni mah se tunah chuan team dang daih an ni a, an match hnuhnung ber kha ka en a, player tin khan inrintawkna an nei a, team hlauhawm tak an ni," tiin manager thar hnuaia United hmasawnna a hmuh hmaih lo.

Emery chuan sawi chhun-zawmin, "Kan tan chuan fiahna ṭha tak a ni a, keini hi vawi 13 FA Cup champion tawh kan ni a, anni hi vawi 12 champion tawh an ni thung. Kan stadium-ah kan supporter hmaah inkhel pawimawh tak hi kan khel dawn," tiin an dinhmun ṭhatna lai a sawi lang.

Gunners tana thu lawmawm chu Chelsea nena an inkhelh ṭumin Laurent Koscielny a khel ṭha em em a, hun rei tak inhliam hnuah French defender hian a theihna tak a rawn pho chhuak leh ṭan niin a ngaih theih. Chutihrualin right back tlan chak Hector Bellerin erawh inhliam vangin tun season a inlan a rinawm tawh lo thung.

Manchester United pawhin Arsenal fachuam an chhuhsak Alexis Sanchez chu a club hlui lakah bul an ṭantir dawn a, nimin tlai press conference-ah Solskjaer chuan, "Mipui lamin an deusawh a nih pawhin nuam a tih ka ring a, an theihna tak tak an cho chhuak zawk ang. Training-naah a che ṭha em em a, ṭha takin a khelh ka ring," tiin Chilean forward a chhawr tur thu a sawi.

United manager lailawk Solsjkaer hian a inkhelh hunlaiin Arsenal a hmachhawn fo a, club pahnih boruak a hrechiang a, hei hian zanin inkhel tur a tingaihnawm zual. Norwegian manager chuan, "Arsenal hi kawng engkima kan elpui ṭhin kha an ni a, an inkhelh tawh chuan boruak a sang a, intlawh kha a tam ṭhin hle. Double champion an ni tawh a, keini chu treble champion kan ni," tiin an inkhelh hun aṭang tawha Arsenal aia an chungnung hret thu a sawi.

Tunah erawh club pahnih hi English club ṭha ber zinga mi ni mah se Premier League-ah pawh an champion a beiseiawm tawh lo a, FA Cup hi nomawi an chawi theihna a nih avangin an la thu tak khawp ang.