Final-ah Rafael Nadal

Rafael Nadal chuan nimin tlai khan darkar khat leh minute 46 chhung lekin Stefanos Tsitsipas 6-2, 6-4, 6-0 a sawpin Australian Open final a lut a, a vawi hnih nan Melbourne-ah nomawi chawi a tum dawn.

Vawiin chawhnu dar 2:00 hian semifinal hnuhnung zawk khelh tur a ni dawn a, world number 1 leh seeded pakhatna ni bawk Novak Djokovic leh seeded 28-na Lucas Pouille te an inkhel dawn, a chak zawk hian Pathianniah Nadal an hmachhawn leh ang.

Nimin tlai Rod Laver Arena-a inkhelah Nadal-a'n a tir aṭanga a tawp thlengin inkhel a thunun chhuak vek, set tinah Greek tlangval service a chhuhsak a, a service a hum vek laiin set hnuhnung berah phei chuan game khat mah hloh loin a tlang thei a ni.

Australian Open khelh mekah Grand Slam vawi 17 champion tawh Nadal hian set a la hloh miah lo a, 2009-a a champion tawhna hmunah hian kum 10 hnua nomawi a chawi leh a nih chuan Open Era chinah major tournament palia vawi khat aia tam champion thei hmasa ber a ni ang.

Kum 32 mi Nadal chuan, "A vawi nga nana Australian Open final ka khel thei tur hi ka lawm, tun thla tir mai kha chuan Brisbane-ah ka inlan thei lo kha a ni a, tunah chuan harsatna nei loin nuam ti takin ka khel thei ta," tiin hliam vanga season bula a tournament khelh hmasak ber tur a khelh theih loh chungchang a sawi.