Messi tel lohna Barcelona an tlawm

Lionel Messi tel loin Barce­lona-in Copa del Rey quar­terfinal first leg an hmachhawn a, Sevilla an zuam sual chiang hle - an mikhualna ramah 0-2 in an tlawm. 

Sevilla tan Pablo Sarabia leh Wissam Ben Yedder ten goal khat ve ve an khung a, squad-a Messi nei lotu Barcelona-in a chhanletna tur goal an nei thei lo. 

Barcelona-in hnehna an chan zawh tak lohah chuan second leg-ah an hna a hau­tak sawt dawn tihna a ni a, Catalan club coach Ernesto Valverde-a'n a hun loah Messi a hahchawlhtirah a ngaih theih. 

Quarterfinal inkhel dangah Getafe chuan rin kai zawk Valencia chu 1-0 in an hneh ve bawk a, mualneitu Getafe tan kum 36 mi forward Jorge Molina Vidal chuan he inkhela goal awmchhun hi a khung. 

Barcelona-in Messi an hahchawlhtir zanah an player thar Kevin-Prince Boateng chu inkhel bul an ṭantir a, Sassuolo aṭanga season tawp thleng atana loan-a an lakluh striker hian a club thar tana a match hmasa berah goal a khung thei lo. 

First half-ah goal lut loin team pahnihin hun an hmang a, chawlhlawk hman hnuah erawh thawnthu thlak danglamin a awm. Pablo Sarabia chuan Quincy Promes hnen aṭanga a ball hmuh chu minute 58-naah a tauh lut. 

Kum 26 mi Sarabia hi Madrid khaw chhuak leh Real Madrid youth system chhuak a ni a, Real senior team tana khel phak loin chhuahsan mah se a hnathawh avang hian Real ṭantute chu an lawm khawp ang!

Barcelona-in si phur mah se 'Barcelona' an nih miau avangin an si phurh sut leh mai tura beiseina a awm a, mahse rin ang ngawt erawh a ni hauh lo. 

Minute 76-naah Sevilla bawkin goal an khung nawn a, Wissam Ben Yedder chuan an goal hnihna hi a khung - Barca fans an hawihai. Season hmasaa Sevilla tana goal 22 khungtu hian tun season-a goal 14 a khungna a ni leh der tawh.

French striker hian a goal khung hi tun hnaia Cardiff City striker thar thlawhtheihna boa chuang Emiliano Sala tan a hlan - a kawr hmaa, "Ka unaupa E. Sala, chak takin awm rawh aw," tih a ziak chu a pholang. 

Barcelona chak loh chhan hi a hrilhfiah dan awlsam ber chu 'an zuam sual' tih hi a ni - Copa del Rey quarterfinal-ah meuh Sevilla laka player an rem dan enin coach Ernesto lo chu dem tur an awm lo.

Messi chuan inkhel bul a ṭan lo nimai loin squad-ah pawh a awm lo a, hei vang hian si an phurh laia anmahni chhanhim tur pawhin lut tur a awm lo - Messi chauh a ni lo, bench-ah Marc-Andre ter Stegen, Luis Suarez, Philippe Coutinho, Jordi Alba leh Sergio Busquets te dah vek an ni. 

Minute 63-naah Suarez leh Coutinho tlan luhtir ni mah se Valverde harhchhuah a tlai tawh a, an si phurh an sut phah lo mai ni loin goal chhuah belh tuah an ṭang!

Barcelona coach Ernesto Valverde chuan a player rem dan avanga a inchhir loh thu a sawi a, "Ka tih dan tur dik takin ka ti a, inchhirna tur ka nei lo," tiin a sawi. 

Spanish manager chuan sawi zawmin, "Player kan siksawi vak chuan a risk san zia kan hrechiang vek a, ka siksawi lai kha chuan team tana ṭha ber tur angin thutlukna ka siamah ka inngai a ni.

"Hnehna kan chan chuan manager fing tak ka ni a, kan chan loh erawh chuan thutlukna ka siamsual let der a ni. Pathianni zanah inkhel pawimawh kan nei a, kan ngaihtuah tel a ngai a ni," tiin Spanish Cup aia league a ngaihpawimawh thu a sawi.