Asian Cup a hmuhnawm dawn
Zanin Asian Cup quarterfinal-ah South Korea leh Qatar an inhmachhawn dawn a, dar 6:30-a inkhel turah hian inkhel hmuhnawm a beisei ngam dawn.
South Korea-in chak loh la nei miah loin quarterfinal an lut a, match li an khelh tawhah goal ruk khungin an lamah goal khat chiah a la lut!
He team hian Son Heung-min an nei lo chung pawhin an ṭha tawh sa a, group stage match hnuhnung ber aṭanga Tottenham forward an neih belh hnuah phei chuan champion tura rin hlawh ber pawl an ni tawh.
Hetihrual hian Qatar hi dah hniam theih an ni bik lo. Match li an khelh tawha chak vek tho an ni a, goal 11 khung tawhin an lamah goal a la lut miah lo - goal sarih khung tawhtu Almoez Ali bawk hi ven tur bik a ni ang.
Zanin dar 9:30-ah inelna thlengtu UAE leh Australia an inhmachhawn dawn a, player an neih dan aṭanga thlir mai chuan Australia hi chak tura beisei an ni.
Hetihrual hian inelnaah chuan a thlengtu tan chet ṭhat chance a sang ṭhin - he thu belhchian tlak zia hre duh tan World Cup 2002 kha keu let mai tur a ni.
UAE hian mipui puihna nen Australia hi an hmachhawn ngei ang a, European top flight football khel phak rual awm khawmna team hi an tlawm a nih pawhin a mak lo ang.