Marseille-ah Mario Balotelli a kal

Manchester City leh Liverpool striker hlui Mario Balotelli chuan Ligue 1 club Nice aṭangin an elpui Marseille a zawm a, an inrem dan chuan tun season tawp thleng a khel phawt ang.

Italy international Balotelli hi nikum December 4 khan an manager Patrick Vieira nen an inhnial buai a, hemi hnu hian Nice tan a inlan zui tawh lo. Nilaini zan khan Marseille zawm tur hian medical a paltlang fel a, a coach thar tur Rudi Garcia chuan, "Kan duh ber," tiin a striker thar chungchang a sawi.

Marseille hi tun dinhmunah chuan Ligue 1 table-ah pasarihna an ni mek a, striker tawnhriat nei ṭha Balotelli an neih belh takah chuan goal khung kawnga an harsatna pakhat chu an sukiang thei tura ngaih a ni. An striker rinrawl neih sa Valere Germain leh Kostas Mitroglou te chuan goal thum ve ve bak an la khung lo.

Kum 28 mi Balotelli hian Nice tan season hnih chhungin league match 55 a khelh aṭangin goal 33 a khung hman a, mahse tun season kal laiah erawh match 10 khel tawhin goal a la khung lo thung.