Neymar a inhliam, a mittui a tla

Paris St-Germain chuan Nilaini zan khan French Cup-ah Strasbourg 2-0 in an hneh a, he inkhelah hian Neymar chu inhliam vangin minute 62-naah an la chhuak. Brazilian forward hi Manchester United nen Champions League last 16 first leg an khelh turah a dinhmun a chiang lo.

PSG hian minute lina lekah Edison Cavani-a goal hmangin hma an hruai a, minute 80-naah Angel Di Maria chuan khung belh mah se Neymar inhliam vangin lawm a kim lo. Manager Thomas Tuchel chuan, "A hmaa hliam a neihna ngaiah bawk a nih avangin Neymar a hlauthawng takzet," tiin a dinhmun a ṭhat loh thu a sawi.

Neymar 10 hian mittui nen khelmual a chhuahsan a, amaehrawhchu PSG jersey number 10 hi an lainat vek lo. Strasbourg player Goncalves chuan, "Player ropui tak a ni a, amah pawh kan zah. Amaherawhchu helai hmunah hian a diriam tura inlan kan ni lo. A thiam thil lantir a duh a nih chuan kan theihna kan pholang ve a ṭul a ni. Kan club hming hi kan venhim ve a ngai a, fiamthu thawhna tur kan ni lo. A khelh dan hmang pawh a ni ang, chutihrualin khatianga a khelh chuan engmah sawisel a thiang lo," tiin a sawi.

PSG star Neymar hi football thiamna ram Brazil-ah pawh a thiam ber zinga mi a ni a, khawvel huap pawhin ball chawh kawiah chuan a ṭha ber zinga mi a ni a, mahse a che uchuak ve hret ṭhin. Strasbourg nen pawh hian Neymar-a'n a thiam thil a pholang nasa a, ball pet tur ang deuha pet ṭhelh te, amah vengtu khen khum hnua tlan hel te a nei a, entu lam tan hmuhnawm ni mah se a tuartu lam tan chuan pawm thiam a harsa ang. FIFA World Cup hnuhnung berah pawh Neymar hi uchuak taka a nat der a ching avangin a muapho hle.

Neymar inhliam chhan tak erawh Strasbourg midfielder Moataz Zem-zemi chuan ball chhuhsak a tumin vawi hnih a tlawh a, referee-in foul a la lak loh avangin a vawi thum nan chiang zetin a tlawh thlu. PSG boss Tuchel chuan, "Vawi thum foul a awm a, referee a inrawlh loh avangin a ke a hliam phah a ni," tiin referee a dem ve thung.

PSG hian France football an thunun a, an hmachhawp lian ber chu Champions League a ni. February 12 zanah French champion hi Old Trafford-ah an lenglut dawn. Neymar hma hian an midfielder pawimawh Marco Verratti chu Inrinnia Guingamp 9-0 a an hneh ṭumin hliam a tuar tawh bawk a, player pawimawh pahnih dinhmun hi a chiang lo.