Salford neitu zingah Beckham

England captain hlui David Beckham chuan 'Class of 92'-a a ṭhiante zawmin National League club Salford City-ah neitu nihna 10% a lei a, Manchester United tana a khelhpui ṭhin Gary Neville, Phil Neville, Ryan Giggs, Paul Scholes leh Nicky Butt te nen he club neitu hi an ni ho dawn tihna a ni. 

Beckham-a'n a ṭhiante a zawm ve leh takah chuan Class of 92-te hian season thara League Two khel thei mai dinhmuna ding mek club-ah hian 60% neitu nihna an nei ta tihna a ni a, Singapore sumdawng hausa Peter Lim chuan 40% neitu nihna a la nei. 

Kum 43 mi Beckham hi official tak erawhin neitu zingah a la tel lo a, England-a football thuneitu sang ber Football Association lam chuan he club-a neitu a nihna hi an la pawmsak leh phawt a ngai dawn tihna a ni. 

Beckham chuan, "Club special tak, mi ṭha bik ten an enkawl a ni. Manchester-a ka hun hman tam zawk kha Salford-ah ka hmang a, ka seilenna hmuna ka ṭhiante ka zawm thei hi ka tan chuan a hlu em em a ni," tiin a sawi. 

English footballer lar ber tia chhal ngam Beckham hian inkhelh a chawlhsan hnuah pawh football a bansan mai lo a, kum 2020 aṭanga Major League Soccer khel tur American club Inter Miami neitu a ni bawk.