Chelsea striker thar Higuain

Gonzalo Higuain chuan tun season tawp thleng loan hmanga khel turin Chelsea a zawm fel ta. Premier League club hian kumin nipui bazar hunah an duh a nih chuan pound maktaduai 31.3 in an la nghet thei ang.

Argentina international hian season chanve hmalam kha Juventus aṭangin AC Milan-ah loan bawkin a kal, Italian club tan hian inelna hrang hrangah match 22 a khelh aṭangin goal riat a khung. Blues hian a ngheta an la lo a nih pawhin June 2020 thleng a loan hun hi pawhsei theih a ni dawn a, pound maktaduai 15.5 an thehchhuah a ngai thung dawn a ni.

Higuain a chhuah vangin Milan hian a hmunruak luah tur an melh nghal a, Genoa striker Krzysztof Piatek chu 2023 thleng cham turin pound maktaduai 30 in an lalut ve nghal. Poland international hian nikum July thla a Genoa a zawm aṭangin match 21 lekah goal 19 a khung sak.

Kum 31 mi Higuain leh tuna Chelsea manager Maurizio Sarri te hi Napoli tan an lo thawkdun tawh, 2015-16 season phei kha chuan Serie A-ah goal 36 khungin Italian football inelna sang bera season khat chhunga goal khung hnem record a nih rual hial - Sarri hian a hriatchian striker a lalut a ni.

Blues manager Sarri chuan, "Striker tharum ngah tak a ni a, a bik takin Napoli ka zawn tirh season khan a khel ṭha zual. Player ka enkawl tawh zinga striker ṭha berte zinga mi a ni a, hun harsa tawk mek mah se kan tan a goal khung theihna a rawn chhawm nun nghal ka beisei," tiin a sawi.

A club thar chungchang sawiin Higuain chuan, "Chelsea ang club sulhnu nei ṭha leh ropui zawm theihna hun ka nei a nih chuan ka tan thutlukna siam a harsa lo," a ti a, Premier League khelh a châk thu a sawi tel. Chelsea director Marina Granovskaia pawhin tun January chhunga an lakluh tum ber chu Higuain hi a nih thu a sawi bawk.

Napoli aṭangin July 2016 khan Higuain hian Juventus a zawm a, Turin club tan hian season hnih chhungin Serie A goal 40 a khung hman. Mahse, nikum nipui lai khan Cristiano Ronaldo a awm ve tak avangin mahni induhtawk ve tak striker hian club dang a zawn phah.

Milan a pan tir lamah a khel ṭha nghal, match nga aṭangin goal ruk a khung nghal. Amaherawhchu, tun hnai a match hnuhnung 12 aṭang erawh chuan goal khat chiah a khung - transfer boruak neuh neuh a neih hian khelmual chhungah pawh ngawng a nei niin a lang.

Tunah chuan Higuain tan Chelsea hun a inṭan dawn. Spanish striker Alvaro Morata a chhuah ngei hmel a, France international striker Olivier Giroud-a'n manager rinna a hlawh zawh loh avangin Higuain hi Blues tlarhma lailum luahtu a ni dawn.