Man City-in League Cup final an thleng

Carabao Cup final thleng turin Manchester City-in harsatna tawk lo a, Etihad Stadium-a 9-0 zeta an sawp tawh Burton Albion chu Nilaini zan khan Pirelii Stadium-ah 1-0 in an hneh nawn a, aggregate-ah 10-0 in an chak. City goal awmchhun hi minute 26-naa Sergio Aguero khung a ni.

Nizan khan Chelsea leh Tottenham Hotspur ten semifinal hnuhnung zawk an khel a, heta chak zawk leh City hian February 24, Pathianniah nomawi an inchuh ang.

League One club Burton hian first leg-ah 9-0 a an chak tawh loh avangin beisei tur an nei tawh lo a, an manager Nigel Clough chuan City laka goal khat khung ringawt pawh mellung pawimawh tak a nih tur thu a sawi.

Burton ṭantute pawhin mualpho nawn dawn pawh ni se chak loh ṭum chu an tawn fo tawh a nih avangin Premier League champion an mikhual ṭum hi hmaih an tum lo. Khawvawt hnuaiah entu 6519 zet an pung khawm a, ṭum danga an inkhel entu chawhrual let a tling. Hei hian football hi chak ringawt a ni lo tih a finfiah 

chiang hle.

Pep Guardiola chuan player naupang zawk khelhna hun a pe a, Pathiannia Huddersfield hnehtu aṭangin player pariat zet a thlak a, Kevin De Bruyne, Aguero leh Danilo te chiah a chhawr nawn.

Player naupang zawk keeper Aro Muric, Philippe Sandler, Eric Garcia, Oleksandr Zinchenko, Phil Foden leh Ian Carlo Poveda te an inlan a, tawnhriat nei Fabian Delph leh Riyad Mahrez te an awm tel tho avangin Pep hian chak ngei a tum tih a lang.

City bul ṭantute kum zat chawhrual hi kum 23 leh ni 323 niin October 29, 2008 hnua an starting eleven naupan ber ṭum a ni.

League One club Burton hian first leg aiin an nawr na a, Will Miller ball pet chu City defender Eric Garcia chuan goalline aṭangin a pet chhuak. Burton pawhin goal chance dang an nei a, amaherawhchu manager Nigel Clough duhthusam erawh a thleng lo. City keeper Aro Muric chuan League Cup match ngaah a vawi li nan a clean sheet.

Minute 90 inkhelah erawh chak phu zawk City-in hnehna an chang a, Aguero chuan minute 26-naah Riyad Mahrez leh Kevin de Bruyne te thawhrah sengin goal awmchhun a khung.

Burton manager Nigel Clough chuan, "Kan khelh dan a lungawi thlak a, tunah chuan kan zahawmna kan nei let leh a ni. Ka player-te hian City player ṭha tak tak bula an khelh avangin nasa takin hma an sawn ang," tiin goal khatin chak lo mah se result-ah a lungngawi thu a sawi.

Manchester City boss Pep Guardiola chuan, "Khelmual kha a nal deuh avangin kan duh angin kan khel thei lo a, a hmawr kan bawk fuh lo. First leg-ah 9-0 zeta kan chak tawh avangin second leg chu a dang lo thei lo a, chutihrualin chak duhna thinlung erawh ka la nei reng a. Carabao Cup hi kan la thu tak a, champion tumin theihtawp kan chhuah zel ang," tiin a sawi ve bawk.