United-in City an hneh, Pep-a hoten final an lut
League Cup semifinal second leg-ah Manchester United-in Nemanja Matic goal hmangin Manchester City 1-0 in hneh mah se Pep Guardiola hote aggregate-ah 3-2 a chakin final an lut. Champion lai City hian final-ah Aston Villa an hmachhawn ang.
Nilaini zan Etihad Stadium-a inkhelah Man City-in inkhel an thunun a, United keeper David de Gea-a'n Sergio Aguero leh Riyad Mahrez te goal khung tur a dang nghal. Ole Gunnar Solskjaer hote an vannei chhunzawm a, Kevin de Bruyne cross chu Raheem Sterling-a'n goal-ah a chantir mah se offside vangin pawm a ni lo.
Minute 35-naah Nemanja Matic-a'n ṭha zetin a volley goal a, Serbian midfielder hian chance pawh awm mang lo aṭanga goal a khung avangin inkhel kalhmang a dang. Man United-in beiseina thar an nei a, amaherawhchu inzat ve veah pawh mualneitu an chungnung laiin goal khungtu Matic chuan Man City counter attack tur a dan chahna lamah yellow card vawi hnihna a hmu a, minute 76-naah hnawhchhuah a ni.
Man City tlarhnungin goal dang an chhuah tawh lo a, Pep-a hoten a zawna a vawi thum nan League Cup final an lut. Pep Guardiola chuan, "Minute 180 chhungin team ṭha zawk kan ni a, kan chance siam ṭhahnem tak kan khung thei lo. Kan khingpuiten tharum an ngah a, set piece aṭangin goal an khung a, goal zawna an pet awmchhun a ni bawk. Inkhel pahnihah team ṭha zawk kan ni," tiin chak phu zawk an nih thu a sawi.
Manchester United manager Ole Gunnar Solskjaer chuan, "Man City an muala vawi hnih hnehtu ka player-te hi ka chhuang. An theihna zawng zawngin an khel a, goal chance insiam tam thei lo mah ila kan nawr ṭhat tho avangin ka lawm," tiin a sawi a, Matic-a red card hmuhna chu thutlukna dik loa a ngaih thu a sawi.
Ngaihnawm
• Manchester City-in Liverpool (vawi li : 1981-1984) leh Nottingham Forest (vawi thum : 1978-1980) hnung zuiin League Cup-ah a zawnin vawi thum final an lut.
• Man City tan vawi riat final an luhna chiah a ni a, anni aia final lut tam chu Liverpool (12), Aston Villa (9, tun season tiamin) leh Manchester United (9) te chiah an awm.
• Man United-in Man City khelmualah a zawnin hnehna an chang. United hi November 1993 leh November 2000 chhung khan Man City khelmualah a zawnin vawi li an chak.
• Ole Gunnar Solskjaer-a'n khualmualah
ṭum hnih Pep Guardiola hote a hneh a, hetiang ti thei pathumna niin manager ropui pahnih Jose Mourinho leh Jurgen Klopp te hnung a zui.
• September 2014 khan Wayne Rooney-a'n
West Ham lakah goal khungin hnawhchhuah a ni zui a, Manchester United zingah Nemanja Matic chu
Rooney hnung zui leh hmasa ber a ni.
Semifinal
1st Leg
Leicester City 1 - 1 Aston Villa
LEI : Kelechi Iheanacho 74'
AST : Frederic Guibert 28'
Manchester United 1 - 3 Manchester City
MANU : Marcus Rashford 70'
MANC : Bernardo Silva 17'; Riyad Mahrez 17';
Andreas Pereira 38' (OG)
2nd Leg
Aston Villa 2 - 1 Leicester City
AST : Matt Targett 12'; Mahmoud Hassan 90+3'
LEI : Kelechi Iheanacho 72'
Manchester City 0 - 1 Manchester United
MANU : Nemanja Matic 35'
Final - March 1, Pathianni
Aston Villa Vs Manchester City