Australian Open: Nomawi inchuh tur Nadal leh Djokovic

Pathianni chawhhnu dar 2:00 hian Rod Laver Arena-ah Australian Open final khelh a ni dawn a, world number 1 Novak Djokovic leh Rafael Nadal te an inhmachhawn dawn.

Tennis season khat chhunga Grand Slam tournament hmasa berah hian seeded pakhatna leh pahnihna in final an lut a, inelna lian neih laia player khel ṭha bera chhal theih pahnih an nih avangin a hmuhnawm ang - Nadal-a'n set a la hloh miah lo a, Djokovic hian set hnih a hloh tawh thung.

Australian Open bikah Djokovic hi a champion thei a nih chuan mipa player zingah Melbourne-a vawi sarih champion thei hmasa ber a ni dawn, vawi ruk champion ve tawh Roger Federer-a'n final a thlen zawh tak loh avangin tun dinhmunah chuan ani chiah hi record thar siam thei tur a ni.

Player pahnih hi tun hmain vawi 52 ngawt an inhmachhawn tawh, record nei ṭha zawk Djokovic-a'n vawi 27 hnehna a chang tawh. Nikum Wimbledon semifinal kha an intawn hnuhnung ber niin, darkar nga leh minute 15 an inkhelh hnuah Serbian tlangval a chak.

Nimin tlai Rod Laver Arena-a semifinal hnuhnung zawk inkhelah Djokovic-a'n service hmasa zawkin a la nghal a, Serbian tlangval hian a khingpui service vawi thum ngawt chhuhsak nghalin set khatna bikah game ruk a la zawn.

Set hnuhnung pahnihah pawh world number 1 hian harsatna a tawk lo, darkar khat leh minute 23 chhung lekin 6-0, 6-2, 6-2 in hnehna a chang a ni. Quarterfinal-a a khingpui Kei Nishikori chu set hnihna lekah hliam vanga a chawlh a ngai tawh bawk, a zawna match hnih hautak lo tak a khelh avangin final atan thahrui a khek thei.

Kum 31 mi Djokovic tan chanchin ṭha a nih laiin, chak lo Pouille tan erawh beiseina a thamral. French tlangval zingah Jo-Wilfried Tsonga chu Grand Slam final khel thei hnuhnung ber a ni a, 2008 Australian Open khan Djokovic hi a hneh lo. Tun tournament-ah pawh Tsonga hi second round-ah a hneh leh, a hnampui Pouille beiseina pawh a tih thamral sak leh ta a ni.

World number 1 Novak Djokovic-a'n season hmasa khan Wimbledon leh US Open nomawi a chawi a, season duhawm a hman avangin kum tawp lamah Nadal khumin ATP ranking-ah roreltu a ni, season kal laiah pawh anni pahnih hi an inel leh dawn.

Kum 2012 Australian Open final-ah khan an intawng tawh a, darkar nga leh minute 53 an inkhelh hnuah Djokovic zawkin 5-7, 6-4, 6-2, 6-7 (5-7), 7-5 in hnehna a chang - kuminah pawh a rei leh a nih pawhin a mak lo ang.

Final thlirin Djokovic chuan, "Darkar ruk kan hnaih hial tawh mai thei, kei chuan inkhel en turin ticket ka lei ang," tiin an inkhel hautak a hmachhawn tur chu fans lam tan pawh a hmuhnawm a beisei thu a sawi.

Ningani khan semifinal hmasa zawk khelh tawh niin Rafael Nadal chuan Stefanos Tsitsipas hnehin a vawi nga nan final a lut a, Spanish tlangval hian Roger Federer-a vaw chhuaktu Greek tlangval a hneh awlsam em avangin thahrui a khek thei.

Kum 32 mi Nadal chuan, "Hun rei tak ka inkhelh loh hnuah Australian Open ka khel a, beisei aia ṭhain ka khel chhuak a ni. Novak hi champion tura rinkai a ni a, he hmunah hian hlawhtlinna vawi tam tak a lo chang tawh a ni," tiin a sawi.

Grand Slam vawi 17 champion tawh Nadal hian nomawi lian chawi hnem lamah Federer (20titles) chauh tluk loh a nei a, a vawi hnih nan Australian Open title a la leh a nih chuan an inthlauhna a ti zim dawn - Open Era bika major tournament palia vawi khat aia tam champion kim thei hmasa ber a ni bawk ang.

Spanish tlangval hian hliam vangin season hmasa tawp lam a hmang zo lo a, kuminah pawh January thlatir lam khan Brisbane International khelh a tum chu a khel thei lo. Australian Open-ah erawh inkhel hmuhnawm lantirin final lut tur hian set a hloh miah lo.