Chhinga Veng 3-0 Mohammedan SC

Nimin khan Rajiv Gandhi Stadium, Mualpuiah a vawi khat nan I League second division khelh a ni a, Chhinga Veng FC-in Kolkata club lar Mohammedan SC chu 3-0 in an sawp.

Mizo club tan hian MS Dawngliana, Lalromawia leh Lalmuanzova ten goal an khung. Point thum hlu tak an hlawhchhuah avangin group hmahruaitu an ni a, group khat aṭangin team hnihin final round an lut ang.

Chhinga Veng FC-in tlarhnung pui turin Ghanaian player Godwin Quashiga an dah a, tlarhmaah Mohammedan SC tlarhnung chhaih buai turin Ukrainian Ronaque Bakshi an hmang. Foreigner pahnih hi Chhingcows tana an bul ṭan hmasak ber ṭum a ni.

Godwin leh leh Bakshi ten an hna chin an hria a, Mizo player-te'n coach duh dan an bel bawk avangin an khel a nung hle.

Chhinga Vengin bul an ṭan ṭha a, minute 3-na lekah Muanzova'n ball ṭha um lutin goal ban pet per mah se a per chu Dawngtea'n goal hmahruai khung nan a hmang.

Mizo club-in passing mawi tak entu mipui an hmuhtir a, passing mawi hian goal dang a keng tel bawk. Minute 25-naah Muanzova'n ding lam kilah ball ṭha a hmu a, winger tlan chak hian ball pet pawh a thiam tih lantirin duhthusamin box chhungah a chhûng lut a, Romawia'n chiang zetin a tauh lut.

Second half pawh thawnthu ngai tho a ni a, khelmual chhungah Chhinga Veng bawk an chungnung a, goal erawh vawi khat chauh hmuh tur a awm thung. 

Minute 81-naah Chhingcows-in counter attack hmangin an vaw let a, substitute MC Malsawmzuala chuan offside trap bumin goal lam panin chak takin a tlan pui nghal a, Mohammedan keeper chiah a hmachhawn hnuah amah thlawp tura tlan Muanzova chu pein ani hian goal ruakah a khung. Chanmari aṭanga Chhinga Veng zawmtu Muanzova hi goal zawng zawngah a inrawlh vek.

Mizoram Premier League-ah Aizawl FC champion mah se season tluana league thununtu chu Chhinga Veng an ni a, he team hi Mizo coach Lalsangzuala Hmar enkawl a ni.

Mohammedan nena an khelh dan thlirin Mizo pa thluak chu India ram club ṭha dang hnehna turin a ṭha tawk tih a lang a, kawng hrang hrangah Mizo club an chungnung a, hemi hrilhfiahtu chu inkhel scoreline 3-0 hi a ni.

Inkhelh banah Chhinga Veng coach Sanga chuan, "Kan muala kan match hmasa berah goal thumin hnehna kan chang a, ka player-te khelh danah ka lungawi hle. Kan team hi eng ang chiaha ṭha nge kan nih tih hriat hi ka duh a, tunah chuan thui tak thleng turin kan ṭha tawk tih kan hmu. Kan thawhrim a, kan inlungrual a, kan rilru zawng zawng kan pek chuan champion ve thei kan ni a, amaherawhchu kan match hmabak zel kan ngaih pawimawh hmasak a ṭul a ni," tiin a sawi.

Chhinga Veng hian match thum an khelhah point sarih an hlawh chhuak a, goal li khungin goal an la chhuah lo. Mohammedan nen hian Chhingcows keeper Zothanmawia'n hna a nei meuh lo. 

I League second division hi an chawl rih dawn a, Chhinga Veng hian February 23-ah match an nei leh chauh dawn. Mizo club hian Trau FC hmachhawn turin Khuman Lampak Stadium, Imphal an tlawh ang.