Football club hausa ber Real Madrid

Real Madrid chuan Manchester United lehpelin football club zinga hausa ber dinhmun an rawn luah thar ve leh ta.

Tun season-a khelmual lama beisei phak lo United hi khelmual pawnah pawh beisei an phak lo a, pathumnaah tla thlain pahnihna chu Barcelona an ni. 

Football Money League tia hming an pek, khawvela football club hausa te tehna hi 2017-18 season-a club ten sum an lakluh bik aṭangin teh a ni a, season hmasa aṭanga tehin top 20 club te sum lakluh chu 6% (£7.4 tld) zetin a pung. 

Real Madrid hian 2017-18 chhung khan pound maktaduai 665.2 an lalut a, an sum lakluh punna zat hi pound maktaduai 85 zet a tling - anmahni hnaih bertu Barcelona nena an inthlauhna chu pound maktaduai 53.6 a tling. 

English Premier League-ah sum a tam tih a hriat a, top 10-ah EPL club paruk zet awmin hei hi record a tling hial a ni. 

Real Madrid-in pakhatna dinhmun an hauh theih chhan hi Champions League nomawi a zawna a vawi thum nana an chawi vang a ni a, Europe-a an champion hian an sum lak nasa takin a tipung a ni. 

Football Money League top 20-a lang phak club te hi European top five league kan tiha club te vek an ni a, EPL-in thawh hnem berin club pakua ngawt an thawh a, Serie A (4), Bundesliga (3), La Liga (3) leh Ligue 1 (1) ten an dawt a ni.