Aizawl FC-ah hmasawnna a awm - Standly Rosario

I League khelh mekah Aizawl FC chuan Pathianni tlai dar 2:00 hian Khuman Lampak Main Stadium-ah Neroca an hmachhawn dawn a, Mizo club coach thar Standly Rosario chuan NorthEast Derby hmachhawn turin an inpeih thu Vanglaini a hrilh.

Aizawl FC hian Standly Rosario hnuaia an match hmasa berah Chennai City 4-3 in an hneh lo a, point hlawh chhuak lo mah se khualmualah hmahruaitu lamah goal thum ngawt an khung theih avangin lawmna tur a awm. 

Standly chuan, "Ka player-te an inlungrual em em a, Mizo leh foreigner inkar boruak a ṭha, chak duhna thinlung kan pu a ni," tiin team boruak a ṭhat thu a sawi.

Mizo club tan chanchin lawmawm dang a awm a, Liberian forward Ansumana Kromah a dam tawh a, Neroca a hmachhawn thei dawn. Aizawl FC coach Standly chuan, "Foreigner panga chhawr theihin an awm vek a, hei hi chanchin lawmawm a ni. NorthEast Derby pawimawh zia ka hria a, Neroca hneh hi kan tan a pawimawh a, point thum hlawhchhuah tumin kan khel dawn," tiin attacking football khelh an tum thu a sawi.

Neroca hi AFC coach hlui Manuel Retamero hnuaiah team ṭha tak an ni a, champion thei zinga mi an ni. Amaehrawhchu, Manipur club hian an match hnuhnung pahnihah Mohun Bagan leh Churchill Brothers te an hneh loh avangin hmahruaitu Chennai City chu point kua in an pha lo a, Aizawl FC laka point an hloh chuan champion beiseina a tawp thei hial ang.

Aizawla North East Derby khelh a nih ṭumin goal awm loin an inhnehtawk a, tun ṭumah erawh point thum hlawh chhuak zawk an awm a rinawm a, Manipur club hi point hloh a lawm lo tur zawk an ni.

I League inkhel dangah Pathianni tlai dar 5:00 hian Kolkata Derby khelh a ni dawn bawk. East Bengal hian point 22 an hmu tawh a, hmahruaitu aia match khata an khelh tlem avangin champion beiseina an la nei ve zel a, an khingpui tur Mariners hian coach thar Khalid Jamil hnuaiah result ṭha an nei a, Red and Gold aiin point khat chauhin an hmu tlem.

Aizawl FC coach hlui Khalid Jamil-a'n a club hlui Bagan a hmachhawn dawn a, East Bengal lamah Mizo player pali Lalrindika Ralte, Lalramchullova, R. Laldanmawia leh Brandon VL Remdika te chu player pawimawh an ni. Tun season-a an intawn hmasak ṭumin Danmawia goal hnih hmangin East Bengal-in 3-2 in hnehna an chang a, Mariners-in phuba lak an tum ang.

Shillong Lajong-in I League-a an match hmasa bera Aizawl FC an hneh hnuah a vawi khat nan hnehna an chang ve leh ta a, nimin khan Minerva Punjab chu 1-0 in an hneh. Lajong goal neih chhun hi hun tawp hnaih lama Naorem Mahesh Singh khung a ni.